Qazaqstandyq dárigerler tájirıbe almasý úshin Qytaıǵa barady

QR DSM Qoǵamdyq densaýlyq saqtaý ulttyq ortalyǵy dırektorynyń orynbasary Serjan Aıdosov Qazaqstan dárigerleri tájirıbe almasý úshin Qytaıǵa baratynyn málim etti, dep habarlaıdy QazAqparat.

– Densaýlyq saqtaý mınıstriniń Qytaı elshisimen sońǵy kezdesýi barysynda Qytaı densaýlyq saqtaý mınıstriniń usynysymen Qazaqstan mamandaryn sol elde tájirıbe almasýǵa jiberý máselesi kóterildi. Osy baǵytta baǵdarlama men baratyn mamandar tizbesin jasap jatyrmyz, – dedi Serjan Aıdosov.

Onyń atap ótýinshe, Qytaıǵa tájirıbe almasýǵa baratyn medısına mamandaryna jumsalatyn shyǵyndy eldiń densaýlyq saqtaý mınıstrligi jáne jergilikti mekemeler tóleıdi.

– Buǵan qosa, elimizdiń syrtqy ister mınıstrliginiń de úlken kómegi bolady. Olar bizge qoldaý kórsetip otyr. Jalpy, mamandarymyzdyń qashan baratyny týraly naqty jospar joq. Biraq 2-3 aptanyń ishinde anyqtalady. Olar Beıjiń qalasyna barady dep josparlanǵan, – dedi ol.