Búgin Májilis Spıkeri Nurlan Nyǵmatýlınniń tóraǵalyǵymen Palatanyń jalpy otyrysy ótti. Onda depýtattar oıyn bıznesine qatysty zań jobasyn I oqylymda talqylaýda.

Osy zań jobasy boıynsha depýtattar kóptegen mańyzdy túzetýler engizdi. Máselen, jumys toby barysynda jańa úsh oıyn aımaqtaryn ashý týraly normalar alyp tastaý, oıyn bıznesin uıymdastyrýshylarǵa zań jobasynda kózdelgen mindetterdi oryndamaǵany úshin ákimshilik jaýaptylyq belgileý jóninde, sondaı-aq, jaqyn týystarynyń ótinishi boıynsha sottyń qumar oıyndardy jáne bás tigýdi teris paıdalanatyn adamdardy áreket qabileti shekteýli dep tanýǵa qatysty usynystar engizdi.

Osy oraıda Nurlan Nyǵmatýlın:

– Shyn máninde, ıgromanııa aýrýǵa jatatyn nárse. Oǵan úırengen adam, ony óz kúshimen jeńe almaıdy. Sondyqtan, depýtattar jańa norma engizip otyr. Ol boıynsha ıgromanııaǵa berilgen azamatty odan shyǵarý úshin týysqandary sotqa bere alady. Bul qajetti jáne tıimdi norma dep esepteımin, –  dedi.

Taǵy bir atap ótetin jaǵdaı, zań jobasynda osy sala qyzmetin retteýdiń jańa tásilderi usynylǵan.

Májilis Tóraǵasynyń aıtýynsha, jańa zań ekonomıkalyq turǵydan da, moraldyq-psıhologııalyq jaǵynan da oıyn bıznesi salasyndaǵy baqylaýdy kúsheıtedi.

Jalpy qujat oıyn bıznesi salasyndaǵy zańnamany jetildirýge jáne bás tigýge qatysýshylardyń quqyqtary men zańdy múddelerin qorǵaýdy kúsheıtýge, sondaı-aq býkmekerlik keńseler men totalızatorlardyń qyzmetin baqylaýdyń tıimdiligin arttyrýǵa baǵyttalǵan.

Májilistiń Baspasóz qyzmeti

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir