Eraly Toǵjanov: Jyldyń aıaǵyna deıin 600-myń adam jumyspen qamtylatyn bolady

Karantınnen shyqqannan keıin aldaǵy birneshe aıda jáne jyldyń aıaǵyna deıin halyqty jumyspen qamtý qalaı iske asyrylatynyn premer-mınıstrdiń birinshi orynbasary Eraly Toǵjanov úkimettiń baspasóz qyzmetinde ótken brfıngte aıtty.

– Bul suraqqa búgin Qasym-Jomart Toqaev erekshe toqtalyp ketti. Búginde qabyldanǵan naqty sharalardyń arqasynda 1 mln-nan asa azamattardyń jumysqa kiriskendigi týraly aıttyq. Biraq ári qaraı da bul jumysty biz jalǵastyrýymyz kerek. Negizgi másele – jyldyń aıaǵyna deıin azamattardy jumyspen qamtý kerek. Mundaı jospar búgin jasalyndy. Birneshe úlken memlekettik programmalar qabyldandy. Osy memlekettik programmalardyń arqasynda 360 myń orynǵa sheıin naqty sharalar belgilenip otyr. Sonymen qatar arnaıy "Eńbek" degen programma bar. Sol programma boıynsha jyldyń aıaǵyna deıin 600-myń adam jumyspen qamtylatyn bolady, – dedi Eraly Toǵjanov. 

Sonymen qatar premer-mınıstrdiń birinshi orynbasary búginde naqty qabyldanǵan, júzege asyrylǵan úlken sharalardyń biri "Jumyspen qamtý jol kartasy" ekenin atap ótti.

– Búgin atalǵan baǵytta 6500-den asa naqty jobalardyń tizimi aımaqtarmen birge qaralyp bekitildi. Jyldyń aıaǵyna sheıin 255-myń adam jumysqa turǵyzylady dep eseptep otyrmyz. Bekitkenimizge bir jumadaı ýaqyt boldy. Búgingi kúnniń ózinde 18 myńǵa jýyq azamattardyń ózi osy naqty baǵdarlama arqyly jumysqa kirisip ketti. Bulardyń barlyǵy qadaǵalaýda. Pandemııanyń kezinde jastardy jumyspen qamtý máselesi kún tártibinde tur. Sondyqtan munyń bári  "Jumyspen qamtý jol kartasy" aınalasynda júzege asyrylatyn bolady, – dep atap ótti premer-mınıstrdiń birinshi orynbasary.