Almatydaǵy «Dańq» memorıaly alǵash ret Jeńis kúninde bos qaldy

Jylda batyrlardyń rýhyna taǵzym jasalyp, Ekinshi dúnıejúzilik soǵysqa qatysqan jaýyngerlerdi ardaqtap, ulyqtaıtyn uly kúnde Almatydaǵy «Dańq» memorıaly alǵash ret bos qaldy. Bul týraly almaty.tv habarlady.

Elge tóngen pandemııa kesirinen beıbit kúnniń belgisine aınalǵan alaýǵa bıyl kelip táý etýge tyıym salynǵan. Dese de Otan úshin otqa túsken batyrlar erligi el esinde máńgi qalady.  

Beıbit sherýge qatysýshylar osynda, ıaǵnı 28 panfılovshylar saıabaǵyna kelip, máńgilik alaýǵa gúl shoqtaryn qoıady. Biraq búgin munda da jan balasy tabylmady. Jalpy, Máńgilik alaý alǵash ret 1975 jyly jaǵylǵan. Ol jarqyn bolashaq pen erliktiń sımvoly bolyp áli de laýlap tur.

Jaýtańdap qarap dala tur,

Kóz jasyn súrtip jańa bir.

Habarsyz ulyn suraýǵa,

Jolyńdy tosyp ana júr.

Qansha úıdiń urlap adamyn,

Qansha úıde sónip qaldy ottar.

Kórdiń be ulyn ananyń,

Soǵystan qaıtqan soldattar?

Qazaqtyń birtýar aqyny Ǵafý Qaıyrbekov bul óleń joldarymen surapyl sum jyldardyń kórinisin bir sát te bolsa kóz aldyńa ákeledi. Otan úshin jan alysyp, jan bergen qansha batyr qan maıdanda qyrshyn boldy. Qanshaýy urys dalasyna sińip sol kúıi osharsyz ketti... Búgingideı qoı ústine boztorǵaı jumyrtqalaǵan kúnge jetý úshin san bozdaqtyń taǵdyry sarp etildi.

Saıabaqta Ekinshi dúnıejúzilik soǵysta kóp paıdalanylǵan «Katıýsha» reaktıvti artıllerııa kóligi tur. Búginde 96 jasqa taıaǵan batyr Jańbyr Kerimqulov sum soǵysta osy kóliktiń zeńbiregin oqtaýshy bolypty. 1942 jyly Arys qalasynda armııaǵa shaqyrylyp, Reseıdiń Gorkıı qalasyna maıdanǵa attanady. Ol kezde Jańbyr ata nebári 18-de bolǵan. Jas jaýynger nemisterge qarsy urysta Dneprden ótip, Avstrııadan bir-aq shyqtym deıdi.

– Ýkraınany tolyq basyp óttik. Odan keıin Moldovııany basyp óttik, Rýmynııanyń shetin basyp, Bolgarııaǵa bardyq. Bolgarııadan Vengrııaǵa bardyq. Býdapeshtti aldyq. Medalim da bar, mine. Vengrııadan shyǵyp, Avstrııa eline bardyq. Ol Gıtlerdiń týǵan jeri eken. Sol jerde soǵysty 1945 jyly 8 mamyrda keshqurym bitirdik, - deıdi Uly Otan soǵysynyń ardageri Jańbyr KERIMQULOV.

Búginde beıbit ómir súrip otyrǵan Jańbyr qarııa 2 uldan, 4 nemere, 6 shóbere súıip otyr. Ol endigi jerde keler urpaq soǵys kórmeı, jarqyn ómir súrse dep tileıdi.

9 mamyr – Jeńis dep jarııalandy. Soǵys bitti. Sodan beri 75 jyl ótti. Maıdannan tek jaýyngerlerdiń dańqy, baǵa jetpes erligi, estelikteri men myna beıbit, mamyrajaı kún qaldy. Qandaı qaýip tónse de, qandaı kesel kelse de elin qorǵaǵan batyrlardyń erligi urpaqtan urpaqqa nasıhattalyp, jalǵasa bermek. Surapyl soǵysta jaýǵa keýde tosqan árbir jaýynger halyq jadynda. Olardyń erligi, batyldyǵy el esinen umytylmaıdy.