«Otan úshin otqa tús, kúımeısiń». Sonaý surapyl jyldary ot pen oqqa qaımyqpaı keýde tosqan ár jaýyngerdiń osy bir qanatty sózdi tereń túsinetini kúmánsiz. 95 jastaǵy mınometshi maıdanger Ivan Botev osylaı dep oı túıindeıdi. 

Soǵys ardageri Ivan Botev 95 jylda ne kórmedim deıdi. Biraq sum soǵystyń surapyl jyldarynyń yzǵarynda aıryqsha shyńdalǵanyn aıtady. Reseıdiń Kemerov oblysy Iаıskıı aýdany Verho-Velıkosılkıı aýylynda týyp ósken. Orta mektepte oqyp júrip, kishkentaı Vanıa jumys ta istegen. Soǵys bastalǵanda ol 8-synypta oqypty. Aldymen maıdan dalasyna ákesi attanǵan. 1943 jyly urysta ákesi jaralanyp, gospıtalǵa jiberildi degen habar estigende, ol 16 jasta bolǵan. Dál sol jyly bozbala Qyzyl armııa qataryna shaqyrtylady.

«Otan qorǵaý búgin jaı sóz bolyp estiledi ǵoı. Alaıda, sol surapyl jyldary bizdiń keýdemizge qasıetti jaýapkershiliktiń qorǵasyndaı salmaǵyn quıatyn. Bizdi birden urys dalasyna jibermedi. Aldymen tyńǵylyqty daıyndyqtan óttik. Voronej mektebiniń radıo mamandarynyń qataryna qosyldym. 1500 adamnan radıo sheberler vzvody qurylǵan bolatyn. 1943 jyldyń qyrkúıeginde oqý bitirgen soń Máskeýge jiberildik. Poltavaǵa birinshi gvardııalyq mehanıkalyq korpýs, 1004 birinshi gvardııalyq dıvızııada, jeńil artıllerııalyq polkta jaýyngerlik mindetimdi atqardym», - deıdi Uly Otan soǵysynyń ardageri, Tyl Eńbekkeri Ivan BOTEV.

Ivan Botev 1-Belarýs maıdanynda shaıqasty. Atqyshtar polkindegi 120 mm mınomettik batareıanyń kózdeýshisi bolǵan. Sibirde týǵan salqynqandy jigittiń tabıǵı mergendiginiń arqasynda qarsylas jaqtyń dot, dzottaryn, oq atý núktelerin birneshe ret jalǵyz snarıadpen joıǵan.

– Radom, Poznan, Lodz qalalaryn bosatyp, nemis shekarasyna shyqtyq. Atý degen qatań buıryq berildi. Germanııanyń birinshi bolyp Shverın qalasyna kirdik. Onda birde-bir adam bolmady. Olarǵa keńestik ásker kelip, bárińdi kesedi, atady, óltiredi depti. Sóıtip Oderge deıin bardyq. Berlınge deıin 90 shaqyrymdaı qalǵan bolatyn, – deıdi Ivan BOTEV qarııa.

Alaıda, osy ýaqytta Ivan Botevty Qazan qalasyndaǵy tanktik ýchılıshege jiberedi. Dál sol jerde ol soǵystyń aıaqtalǵanyn saltanatty otshashýdan biledi. Bul erekshe sát áli de esimde, deıdi soǵys ardageri. Urys aıaqtalǵanymen, Ivan Botev áskerde qyzmet ete beredi. 20 jyldaı tankıst bolyp, 10 jyldaı oqý bólimshelerinde jumys isteıdi.

Ýlıanovsk ýchılıshesinde mehanıkterdi sý astyndaǵy júrgizýdi úıretken. 1971 jyly polkovnık shenimen zeınetke shyqty. 30 jyldaı Reseı Federasııasynyń azamattyq júıesinde qyzmet atqardy. Al 2012 jyly Reseıden Qazaqstanǵa kóship kelip, qazaq jerin qutty qonysy sanaıdy. Qazir ardager qyzynan nemere-shóberelerin tárbıelep, baqytty ǵumyr keship jatyr.

"Qamshy" silteıdi
Ilmek sózder: Ivan Botev Jeńis

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir