Kólbaı Ánápııauly: Surapyl soǵys óte qıyn boldy

18 jasynda soǵysqa attanǵan Kólbaı Ánápııauly ótken ǵasyrdaǵy kórgen qıyndyqtaryn eske alyp, endigári mundaı náýbettiń qaıtalanbaıtynyna tilektestik bildirdi.

Kólbaı Ánápııauly 1926 jyly 13 maýsymda Jambyl oblysy, Merki aýdany, Surat aýylynda dúnıege kelgen. Ardagerge 1944 jyly soǵysqa shaqyrtý kelip, Semeı qalasynda polktaǵy soǵys tásilin úırený úshin 6 aı oqý-jattyǵý jıynynda bolǵan. Ekinshi Belarýs maıdany 12-gvardııa dıvızııasynyń 197-polkinde mınometshi bolyp soǵysqa qatysqan.

– Soǵysta ózimmen birge 2 qazaq ǵana boldy. Surapyl soǵys óte qıyn boldy. Snarıadtar, bombalar jarylǵanda qatty qulap túskenim esimde, Allanyń qalaýymen elime aman-esen oraldym. Jeńisti qarsy alǵan sáttegi qýanysh jadymda máńgilikke umtylmastaı jattalyp qaldy, – deıdi K. Ánápııauly.

Ardager barsha qazaqstandyqtardy Uly Jeńistiń 75-jyldyǵymen quttyqtap, qarjylaı kómek kórsetip jatqan úkimetke alǵysyn aıtty.

– Uly jeńistiń 75-jyldyǵy qutty bolsyn. Elimizde tynyshtyq bolsyn, Qazaq eli aman bolsyn. Naýryz aıynda bastalǵan qaýipti indetke qaramastan úkimet tarapynan Uly Otan soǵysy ardagerlerine kóptegen qarjylaı kómek kórsetilip, syılyqtar berilip jatyr. Osy tusta bizdi elep-eskerip, quttyqtap jatqandaryna alǵysym sheksiz! Allanyń qalaýymen qazirgi ýaqytta balalarymnyń, nemerelerimniń qamqorlyǵynyń arqasynda ómir súrip jatyrmyn. Barshańyzǵa kóp raqmet!, – dep ardager alǵysyn bildirdi.