Anglııa ǵalymdary: Koronavırýs qazanda tarala bastaǵan

Anglııa ǵalymdary koronavırýs ótken jyly qazannan bastap taralýy múmkindigin aıtty. Bul týraly Qamshy tilshisi  anglııalyq The Express basylymyna silteme jasap habarlaıdy.

Ǵalymdardyń pikirinshe, koronavırýstyń taralýy qazan aıynan bastalǵan bolýy múmkin jáne sol aıda Ýhanda ótken Dúnıejúzilik Áskerı Oıyndarǵa qatysýshylar vırýstyń álemge taralýyna sebepshi bolǵan bolýy yqtımal.

University College London jáne Reunion Island ýnıversıtetiniń zertteýshileri birlesken zertteý júrgizgen. Zertteýde qańtar aıynan bastap álem boıynsha jınalǵan 7000-nan astam genomdar tizbegi saraptaldy. Osy úlgilerden alynǵan vırýstyń mýtasııasyn zertteý nátıjesinde ǵalymdar koronavırýs adamdarǵa 6 qazan men 11 jeltoqsan aralyǵynda juqty dep sanaıdy. Zertteý nátıjeleri aldaǵy ýaqytta ǵylymı basylymda jarııalanady.