Maqtaaral aýdanynda jańadan 500 úı salynady

Túrkistan oblysy óńirlik kommýnıkasııalar qyzmetiniń alańynda Maqtaaraldaǵy sý tasqynynyń saldaryn joıýǵa qatysty brıfıng ótti. Bul týraly Qamshy.kz aqparat agenttigi QazAqparat habarlaıdy.

Oǵan Túrkistan oblysy ákiminiń orynbasary Sáken Qalqamanov pen О́zbekstan Respýblıkasynyń Tótenshe jaǵdaılar mınıstriniń birinshi orynbasary Abdýlla Quldashev jáne Túrkistan oblysy Tótenshe jaǵdaı departamentiniń bastyǵy Nurǵalı Júnisov qatysty.

Brıfıngke qatysqan О́zbekstan Respýblıkasynyń TJM birinshi orynbasary Abdýlla Quldashev tehnogendik apat aımaǵynda jergilikti ákimshilik pen TJD qyzmetkerleri júıeli jumys atqaryp jatqanyn atap ótti.

– О́zbekstan Respýblıkasynyń Prezıdenti Sh.Mırzıeevtiń tapsyrmasy boıynsha Maqtaaral aýdanyna keldik. Sý basqan aımaqqa 300-den astam qyzmetker, 186 tehnıkamyz jumyldyrylǵan. Onyń ishinde qutqarýǵa arnalǵan, ınjenerlik, sý tasý, júk kólikteri bar. Jergilikti áriptesterimizben tyǵyz qarym-qatynasta táýlik boıy osymen 3 kún jumys isteýdemiz. Qazirgi mindetimiz - kollektorlardy tazartý, sý tasyǵan jerlerdi qalpyna keltirý. 50-den astam sý tartý nasosy kúndiz-túni jumys istep turǵandyqtan, keshe 34 myń kýb sý syrtqa shyǵaryldy. Nátıjesinde Fırdoýsı aýylynda sý deńgeıi aıtarlyqtaı tómendedi. Biz aımaqtaǵy tótenshe jaǵdaı aıaqtalǵansha osynda bolamyz, – dedi Abdýlla Hamıdollauly.

Brıfıng barysynda Memlekettik komıssııa sheshimimen júzege asyp jatqan jumystardy atap ótken oblys ákiminiń orynbasary Sáken Qalqamanov Jeńis, Jańaturmys, Dostyq aýyldary tolyqtaı kóshiriletinin, ol úshin Myrzakent aýylynan 500 turǵyn úı salýǵa 50 gektar jer belgilengenin atap ótti.

– Reseılik kásipker Álisher Ýsmanov sý tasqynynan zardap shekken Maqtaaral aýdanynyń evakýasııalanǵan 30420 turǵyny úshin «Túrkistan» áleýmettik damý korporatıvtik qoryna 5 mln 202 myń AQSh dollaryn aýdardy. Bul qarajat evakýasııalanǵan 5202 otbasynyń jeke shottaryna túsetin bolady. Sondaı-aq, qorǵa otandyq kásipkerler men azamattardan 160 mln teńgege jýyq qarjy tústi. Jınalǵan qarjy zardap shekken otbasylarǵa baǵyttalady. Gýmanıtarlyq kómek retinde shtab qoımasyna 270 tonna azyq-túlik tústi, onyń búginde 90 tonnasy elge taratyldy, – dedi Sáken Qalqamanov.

Túrkistan oblysy TJD bastyǵy Nurǵalı Júnisov brıfıngte apat aımaǵyna elimizdiń Qorǵanys salasynan 1000-nan astam mamannyń jumyldyrylǵanyn jetkizdi.

– Qazirgi tańda sýdyń deńgeıi tómendeýde. О́rgebas, Nurly jol, Fırdoýsı, Jeńis eldimekenderinde sý sorý jumystary jalǵasýda. Qorǵanys mınıstrligi, Ulttyq ulan, TJD men Polısııa Departamentinen 1365 adam jumys atqarýda. Máselen, 75 motopompa sý sorý jumystarynda, 44 qaıyq sý basqan eldimekenderde turǵyndardyń úılerinen zattaryn tasý jumystaryna jumyldyrylǵan, – dedi Nurǵalı Júnisov.