Nur-Sultanda jeńildikpen beriletin 8 myńnan astam páter salynady

Bıyl elordada jeńildikpen beriletin 8 myńnan astam páter salynady. Bul týraly qala ákimdiginiń baspasóz qyzmeti habarlady.

Qala ákimi Altaı Kólginov R. Qoshqarbaev dańǵyly men Aınakól (№23-17), R. Qoshqarbaev pen A 104 (jobalyq ataýy) kósheleriniń qıylysynda ornalasqan birqatar áleýmettik turǵyn úılerdiń qurylys barysymen tanysty.

Áleýmettik páterlerdiń jalpy aýdany – 500 myń sharshy metr. Páterler kezekte turǵan az qamtylǵan azamattar men turǵyn úı qurylys jınaq bankiniń salymshylaryna eseptelgen. Elorda ákimi Altaı Kólginov turǵyn úılerdiń qurylysy kezinde «qadamdyq qoljetimdilik» qaǵıdasyn eskerý qajet ekenin atap ótti. Jańadan salynǵan turǵyn úıler barlyq jaǵynan yńǵaıly bolýy kerek.

– Turǵyn úılerdiń qasynda adamdardyń turmys-tirshiligin qamtamasyz etetin barlyq nysandar bolýy kerek. Jańadan salynǵan úılerdiń birinshi qabatynda balalarǵa arnalǵan shaǵyn ortalyqtar, emhana, polısııa pýnktin, ońaltý ortalyqtaryn ashqan jón. Balany mektepke ne balabaqshaǵa aparý úshin qalanyń basqa shetine barý qajettiligi týyndamaıdy. Memleket basshysynyń tapsyrmasyna sáıkes bıyl qurylys kólemi úsh ese ulǵaıady. Eger 2019 jyly 2900 turǵyn páter alsa, bıyl 8 myńnan astam páter beriledi, – dedi qala ákimi Altaı Kólginov.

Sonymen birge elordada apatty jáne eski úılerdiń turǵyndaryn kóshirý jumystary júrgizilip jatyr. Bıyl 5 apatty úıdi buzyp, 200-den astam páter turǵyndaryn kóshirý josparlanyp otyr. 2019 jyly «Nurly jer» baǵdarlamasy aıasynda eski 8 úıdiń turǵyndary qonys aýdardy. 90-nan astam otbasy jańa páterlerge kóshti. Turǵyndardy kóshirý jumystary 39 razezde de júrgizildi. Úıler munaı bazalaryna jaqyn jerde ornalasty.