«Qazaqstandyqtar – Keńes Odaǵynyń Batyrlary» derekti beıneantologııasy kórsetiledi. Bul týraly Nur Otan partııasy Tóraǵasynyń birinshi orynbasary Baýyrjan Baıbek Facebook jelisindegi paraqshasynda aıtty.

«Qurmetti dostar! Sizderdi Jeńistiń 75 jyldyǵy qarsańynda «Astana» telearnasynda «Qazaqstandyqtar – Keńes Odaǵynyń Batyrlary» derekti beıneantologııasy kórsetile bastaıtyny týraly habardar etpekpin.

Uly Otan soǵysyna Qazaqstannyń 1 mıllıon eki júz myńnan astam ul-qyzy qatysty. Árbir ekinshi otandasymyz maıdannan oralmady. 530 qazaqstandyq Keńes odaǵynyń batyry ataǵyna ıe boldy. Táýelsizdik alǵannan keıin Elbasynyń jarlyǵymen Uly Otan soǵysynyń taǵy 9 qatysýshysyna «Halyq Qaharmany» ataǵy berildi.

Dańqty qaharmandarymyzdyń erlik tarıhy tańbalanǵan 70 derekti fılmnen turatyn bul kınotýyndylar jelisi Nursultan Ábishuly Nazarbaevtyń tapsyrmasymen 2015 jyly túsirildi. Bul úshin «Ardagerlerdi ardaqtaıyq» partııalyq jobasynyń aıasynda aýqymdy arhıv materıaldary jınaqtaldy. Sonymen birge munda maıdannan jazylǵan hattar men jeke jazbalar da qamtyldy.

Aldaǵy merekelik demalys kúnderin eskersek, qazaqstandyqtarǵa Baýyrjan Momyshuly, Raqymjan Qoshqarbaev, Talǵat Bıgeldınov, Leonıd Beda, Álııa Moldaǵulova, Sergeı Lýganskıı, Mánshúk Mámetova, Saǵadat Nurmaǵambetov, Nurken Ábdirov syndy aty ańyzǵa aınalǵan qaharmandarymyz ben basqa da batyrlarymyzdyń erlikteri, olardyń soǵystan keıingi ómirleri týraly taǵy da bir eske túsirýdiń keremet múmkindigi usynylyp otyr.

О́kinishke qaraı, jyl ótken saıyn surapyl soǵysta qan tókken, maıdannyń bar qajetin qamtamasyz etý úshin tylda jan aıamaı eńbek etken ardagerlerimizdiń qatary sırep barady.

El Táýelsizdiginiń tuǵyryn nyǵaıtý barysyndaǵy barsha qıyndyqtarǵa qaramastan, Elbasynyń syndarly saıasatynyń arqasynda turaqtylyq, beıbitshilik pen kelisim saqtaldy. Sondyqtan biz, ásirese jas býyn, búgingi beıbit te erkin ómirimiz úshin bastaryn báıgege tigip, sol jolda janqııarlyqpen shaıqasqan qazaqstandyq qaharmandarymyzdyń uly erlikterin eshqashan umytpaýymyz kerek.

Aǵa býynnyń erligi men namysy, erjúrektigi men adaldyǵy, dostyǵy men otanshyldyǵy búgingi jáne bolashaq Otan qorǵaýshylarymyzǵa úlgi bolýǵa tıis.

Barshańyzdy aldaǵy Otan qorǵaýshylar kúnimen jáne Uly Otan soǵysyndaǵy Jeńistiń 75 jyldyǵymen quttyqtaımyn», - dep jazdy Baýyrjan Baıbek.

Aıta keteıik, atalǵan fılmderdi «Astana» telearnasynyń efırinen bólek, YouTube-arnasy men @Astana.TV áleýmettik jelilerinen de tamashalaýǵa bolady.

"Qamshy" silteıdi
Ilmek sózder: Jeńistiń 75 jyldyǵy

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir