Almaty qalasynda halyqqa áleýmettik kómek kórsetildi

Almatyda tótenshe jaǵdaıdyń engizilýine baılanysty halyqtyń barlyq osal toptaryna belsendi áleýmettik qoldaý kórsetilýde. Qarajattar respýblıkalyq jáne jergilikti bıýdjetterden, sonymen qatar «Birgemiz» jáne «Jańa Alataý» qorlarynan bólinýde. Bul týraly qala ákimdiginiń baspasóz qyzmeti habarlady.

Osylaısha, respýblıkalyq bıýdjetten jalpy 69 myńǵa jýyq qala turǵynyn azyq-túlik jáne turmystyq quraldarmen qamtamasyz etý úshin 2 AEK-ten tólendi. Sonyń ishinde birinshi jáne ekinshi toptaǵy múgedekter, 16 jasqa deıingi múgedek balalar, múgedek balasyn kútýshi ata-analar, AÁK alatyndar bar.

Sonymen birge keminde 2 AEK-ten kem emes mólsherde 3 top múgedekteri jáne resmı túrde jumyssyz dep tirkelgen shamamen 24 myń adamǵa tólemaqy berý qarastyrylyp jatyr.

Sondaı-aq, Almaty qalasy boıynsha halyqqa áleýmettik kómekti Elbasynyń bastamasymen qurylǵan «Birgemiz» qoǵamdyq qory kórsetýde. Atalǵan qor halyqtyń osal toptaryna, ıaǵnı 23 myńnan astam adamǵa 50 myń teńgeden bólip tóleý úshin shamamen 1,2 mlrd tg bólýdi josparlap otyr. Olardyń qataryna áleýmettik az qamtylǵandar otbasyna kiretin kópbalaly otbasylar, birinshi toptaǵy múgedekter, múgedek balany qaraýshy ata-analar, eń tómengi zeınetaqy alatyn zeınetkerler men jetimder bar.

Sonymen qatar Almaty qalasynyń jergilikti bıýdjeti esebinen sáýir aıynyń sońyna deıin 18 myńnan astam UOS múgedekterine, sondaı-aq olarǵa teńestirilgender men eńbek maıdanyna qatysýshylarǵa bir rettik tólem berý josparlanyp otyr. Osylaısha 206 UOS qatysýshylary men múgedekterge 1 mln tg, 4 myńnan asa adam – 100 myń tg jáne 14 myńǵa jýyq adam – 50 myń tg alady.

Qoldanystaǵy qoldaý sharalarymen qamtylmaǵan muqtaj adamdarǵa azyq-túlik jıyntyqtary (10,5 myń tg) jáne sanıtarlyq-gıgıenalyq quraldar paketi (10,5 myń tg) túrinde «Jańa Alataý» qory men «Nur Otan» partııasynyń demeýshilik qarajaty esebinen áleýmettik kómek retinde kórsetiledi. Búginde osyndaı sebetter men jıyntyqtardy 4,7 myńnan astam adam alyp úlgerdi. Olardyń arasynda úılerine baryp qyzmet kórsetiletin jalǵyzbasty zeınetkerler, 2020 jyldyń jańa talaptaryna sáıkes kelmeıtin, 2019 jyldyń sońynda memlekettik AÁK alýshylar qataryndaǵy azamattar bar.

Oǵan qosa, búginde TJ kezinde kirisinen aıyrylǵan 6650 qala turǵyny 1 ETJ mólsherinde memlekettik áleýmettik saqtandyrý qorynan – 42,5 myń teńge kóleminde memlekettik áleýmettik kómek aldy.

Jalpy, atalǵan járdemaqyny alý úshin búginde Almaty qalasynda 7306 qyzmetkerdi quraıtyn kásiporyndardan 2247 ótinish kelip túsken.