Almaty qalasy «Áleýmettik medısınalyq saqtandyrý qory» KEAQ fılıalynyń dırektory Nurlybek Qabdyqaparov QR Prezıdentiniń tapsyrmasyn oryndaý aıasynda 1 sáýirden bastap 1 shildege deıin saqtandyrylmaǵan azamattardyń MÁMS júıesine medısınalyq kómek alý quqyǵyn uzartý týraly aıtyp berdi. Bul týraly qala ákimdiginiń baspasóz qyzmeti habarlady.

– Sáýir aıynan bastap elimizde mindetti áleýmettik medısınalyq saqtandyrý júıesi tolyqqandy iske qosylýy tıis bolatyn. Biraq memleket basshysynyń koronavırýs indetine baılanysty bergen tapsyrmasyna sáıkes, bul merzimdi 1-shildege aýystyrý týraly sheshim qabyldandy. Iаǵnı, osy ýaqytqa deıin Qazaqstannyń barlyq turǵyndary «shartty» túrde saqtandyrylǵan bolyp sanalady. Bul elde turatyn árbir azamattyń tegin medısınalyq kómek túrlerin ǵana emes, medısınalyq saqtandyrý paketindegi qyzmetterdi de paıdalanýyna múmkindik beredi. Jalpy alǵanda, bul múmkindikti 2,5 mıllıonnan astam adam paıdalana alady, – dedi Nurlybek Qabdyqaparov.

Ol sondaı-aq, qor óziniń ishki rezervinen 20 mlrd teńgeden astam qarjy bólýdi josparlap otyr. Ol saqtandyrylmaǵan azamattardyń kompıýterlik tomografııa, magnıtti-rezonanstyq tomografııa, PSR syndy qymbat analızderge degen suranysyn qanaǵattandyrýǵa jumsalmaq.

– Qazir elimizde barlyǵy 16,4 mıllıonǵa jýyq adam saqtandyrylǵan bolyp sanalady. Onyń 11 mıllıonǵa jýyǵy – áleýmettik jaǵynan az qamtylǵan sanattar. Bylaısha aıtqanda, halyqtyń jartysynan kóbi bıýdjet esebinen saqtandyrylyp otyr, – dedi.

Spıkerdiń aıtýynsha, medısınalyq saqtandyrý qory halyqqa kórsetilgen medısınalyq qyzmetter aqysyn tóleıtin qarjy operatory ekenin, 2020 jyly respýblıka boıynsha 1 250-den astam medısına uıymymen kelisimshart bekitilgen, onyń 600-den astamy – jekemenshik. Jetkizýshilermen bekitilgen kelisimsharttyń jalpy somasy 1,3 trln teńge. Al, Almaty qalasy boıynsha bıyl 182,2 mlrd teńgeniń qyzmetin satyp alý kózdelgen. Onyń: 110,7 mlrd teńgesi – tegin medısınalyq kómek paketine, 71,4 mlrd teńgesi – saqtandyrý paketine tıesili.

– Esterińizge sala ketsem, Qazaqstanda mindetti áleýmettik medısınalyq saqtandyrý júıesi 2020 jyldyń basynda engizildi. Áýelde jyldyń bastapqy úsh aıy ótpeli kezeń retinde jarııalandy. Sebebi, jańa júıe bolǵandyqtan ártúrli suraqtardyń týyndaıtyny ras. О́tpeli kezeń osyndaı máselelerdi sheship, turǵyndardyń jańa júıeni baǵalap, onyń artyqshylyqtaryn sezinýi úshin engizilgen bolatyn. Degenmen, bul Qazaqstan azamattary men osynda turaqty turatyn sheteldikterdi jarna tóleý mindetinen bosatpaıdy. Shildeniń birine deıin saqtandyrylmaǵan turǵyndar MÁMS paketindegi qyzmetterdi paıdalana almaıdy.

Biraq bul saqtandyrý júıesine enbegen azamattar medısınalyq kómekten qaǵylady degendi bildirmeıdi. Bizde memleket tarapynan kepildik berilgen tegin medısınalyq kómek bar jáne ol barlyq azamattarǵa kórsetiledi. Iаǵnı, shuǵyl jaǵdaılarda kez-kelgen adamǵa kez-kelgen jerde kómek berilýi tıis. Mysaly, olar burynǵysha jedel járdem shaqyrta alady, sozylmaly, qaýipti jáne áleýmettik mańyzy bar aýrýlar tegin emdeledi, dári-dármekpen qamtamasyz etiledi, – dedi fılıal dırektory.

Spıkerdiń aıtýynsha jalpy, qazirgi tańda Qorǵa qarjy jınaqtaý jalǵasyp jatyr. Saqtandyrý júıesi iske qosylǵan 2017 jyldyń 1-shildesinen 2020 jyldyń 31-naýryzyna deıingi aralyqta Medısınalyq saqtandyrý qoryna 298,1 mlrd teńgeden astam qarjy jınaqtalǵan.

– Almaty qalasy jarna tóleý jaǵynan kósh bastap tur – jınaqtalǵan somanyń besten bir bóligi burynǵysha, ońtústik astanalyqtarǵa tıesili. Atap aıtqanda, almatylyqtardyń Qorǵa aýdarǵan jarnasy 60 mlrd. teńgeden asyp jyǵyldy. Onyń 54,7 mlrd teńgesi – jumys berýshilerge tıesili. Sondaı-aq, jyl basynan beri ózin-ózi jumyspen qamtyǵan 10 myńǵa jýyq almatylyq turǵyn 40,1 mln teńge kóleminde biryńǵaı jıyntyq tólem tólegen, – dedi N. Qabdyqaparov.

Ilmek sózder: MÁMS júıesi Almaty

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir