02 Sáýir, 2020 NEWS

Karantın: Almatyda egde jastaǵy qarttarǵa tegin tamaq taratý aksııasy jalǵasyp jatyr

almaty.tv

Almatyda egde jastaǵy qarttarǵa tegin tamaq taratý aksııasy jalǵasyp jatyr. Buǵan deıin 400-ge jýyq 90 jastan asqan qarııaǵa ystyq tamaq taratylsa, endi mundaı qaıyrymdylyq sharanyń aıasy ulǵaıyp, 80-degi qarttar da ystyq aspen qamtyldy. Bul týraly almaty.tv habarlady. 

Igi isti «Nur Otan» partııasy men Respýblıkalyq Nomad MMA Federasııasy qolǵa alǵan.

Eldiń qazynasy sanalatyn qarııalarǵa karantın kezinde kóńil bólý eselene túsken búginde. Bılik tarapy 65 jastan asqan adamdarǵa úıde otyrýǵa keńes berse, 80-nen asqan zeınetkerlerge daıyn ystyq taǵam taratý jalǵasyp jatyr. Igi iske «Nur Otan» partııasy men Nomad MMA Federasııasy muryndyq bolǵan. Uıymdastyrýshylar buǵan deıin 400-ge jýyq 90-daǵy qarııaǵa qamqorlyq jasasa, endi tegin tamaqpen 80-nen asqan zeınetkerler de qamtylýda.  Myńǵa jýyq qartqa kúndelikti ystyq as jetkizilip otyrady. Bul sandardyń kólemi kún ótken saıyn ulǵaıyp jatyr deıdi.

– Mundaı qaıyrymdy isti kórgen basqa joldastarymyz da óz úlesterin qosyp jatyr. Sondyqtan da biz kómek beretin qarttardyń kólemin ulǵaıttyq. Kúnde tizimge 200-300 adamnan qosyp jatyrmyz. Koronavırýs juqtyrǵandardyń sany artýyna baılanysty biz qaýipsizdikke, tazalyqqa jiti mán beremiz. Sol sebepti buǵan deıin eriktilermen jumys istegen bolsaq, endi taǵamdardy jetkizý úshin kásibı kýrerlerdi tartyp, qoıan-qoltyq jumys atqaryp jatyrmyz, – dedi Respýblıkalyq Nomad MMA federasııasynyń prezıdenti Gadjı GADJIEV.

Qarııalarǵa beriletin taǵamdardyń quramy men daıyndalý sapasyna da erekshe kóńil bólinedi deıdi mundaǵylar. Qarttarǵa kúndelikti tamaqty buǵan deıin «Jas Otan» jastar qanatynyń eriktileri taratatyn. Endi bul mindet kásibı kýrerlerge júktelipti.

Kýrerler kúnde osyndaı tekseristen ótip, sanıtarlyq tazalyqtar erekshe saqtalady. Jetkizýshi mamandar barlyq jeke gıgıenalyq kıimdermen qamtylypty. Qaýipsizdik jáne tazalyq sharalary táptishtep túsindirilgen. Barlyq sanıtarlyq sharalar jasalǵannan keıin ǵana daıyn bolǵan tamaqtar kýrerlerdiń qolyna typsyrylady.

Búgin 750 túski as qarttardyń úıine deıin jetkizildi. 

Sondaı-aq, taǵamdardy býyp-túıetin adamdar, tipti daıyn asty jetkizetin júrgizýshilerdiń de tazalyǵy qatań nazarda. Bul ıgi bastama elimizdiń ózge de óńirlerinde qolǵa alyna bastapty. Máselen, Qaraǵandy, Atyraý, Aqmola sııaqty oblystarda dál osyndaı aksııa jalǵasyn taýyr jatyr.

Ilmek sózder: Almaty «Nur Otan»

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir