360 myń otbasy Birgemiz qorynan kómek aldy

Bul týraly Nur Otan partııasy Tóraǵasynyń birinshi orynbasary Baýyrjan Baıbek Facebook jelisindegi paraqshasynda jurtshylyqty Qazaqstan halqynyń birligi kúnimen quttyqtaǵan jazbasynda aıtty.

«Qadirli dostar, barshańyzdy Qazaqstan halqynyń birligi kúnimen shyn júrekten quttyqtaımyn. Bul mereke – Tuńǵysh Prezıdent Nursultan Nazarbaev negizin salǵan halqymyzdy uıystyrý ıdeıasynyń jarqyn kórinisi. Qashanda birlik, kelisim jáne ózara qurmet – elimizdiń tabysty da ornyqty damýynyń berik tuǵyry.

Búginde Elbasynyń tapsyrmasy boıynsha «Nur Otan» partııasy Memleket basshysy Qasym-Jomart Toqaevtyń bastamasymen qolǵa alynǵan biregeı sharalarǵa atsalysyp, buǵan qosymsha muqtaj qazaqstandyqtarǵa ataýly kómek kórsetýdi jalǵastyryp jatyr.

Qazirdiń ózinde 98 myńnan astam otbasy azyq-túlik jıyntyǵy men antıseptıkalyq zattar aldy. Budan bólek 100 myń otbasy tegin maskamen qamtamasyz etildi.

Elbasy Nursultan Nazarbaevtyń bastamasymen qurylǵan «Birgemiz» qory osy aptada Qazaqstan halqynyń birligi kúni qarsańynda taǵy 210 myń otbasyǵa 50 myń teńgeden birjolǵy tólem jasap, kómek kórsetýdiń ekinshi kezeńin aıaqtady. Osylaısha, elimizde 360 myńnan astam muqtaj otbasy tikeleı qarjylyq kómek aldy. Otbasy múshelerin qosqanda, bul shamamen 1 mln. qazaqstandyqty qamtıdy.

Elbasy óz quttyqtaýynda atap kórsetkendeı, «halqymyzdyń yrys-yntymaǵy tarıh pen taǵdyr syıy emes, árqaısymyzdyń eren eńbegimiz ben zor jaýapkershiligimizdiń nátıjesi».

Halqymyzdyń birligi men yntymaǵy, ózara qoldaýy men ór rýhynyń arqasynda biz kez kelgen qıyndyqty, onyń ishinde qazirgi daǵdarysty da eńseretinimizge senimdimin. «Nur Otan» partııasy Nursultan Nazarbaevtyń basshylyǵymen buǵan bar kúshin salady.

Barshańyzǵa myqty densaýlyq, tolaǵaı tabys, otbasylaryńyzǵa amandyq jáne baq-bereke tileımin!» – dedi Baýyrjan Baıbek.