N.Nyǵmatýlın: Zań jobasy jemqorlyqpen kúresti odan ári kúsheıtýge baǵyttalǵan

Májilis Spıkeri Nurlan Nyǵmatýlınniń tóraǵalyǵymen Palatanyń jalpy otyrysy ótti. Onda depýtattar sybaılas jemqorlyqqa qarsy is-qımyl máseleleri týraly zań jobasyn birinshi oqylymda maquldady. Bul týraly májilistiń baspasóz qyzmeti habarlady. 

Májilis Tóraǵasy atap ótkendeı, zań jobasyna engizilgen jańa túzetýler arqyly aǵymdaǵy jyly parlament sessııasynyń ashylýynda memleket basshysy Qasym-Jomart Toqaevtyń tapsyrmasy júzege asyryldy.

– Osy maquldanǵan zań jobasy elimizdiń ashyq jáne turaqty damýy jolyndaǵy taǵy bir mańyzdy qadam deýge bolady. Sebebi, árbir demokratııalyq damyǵan elde sybaılas-jemqorlyqqa jol joq. Sondyqtan, tikeleı memleket basshysy Qasym-Jomart Kemeluly Toqaevtyń tapsyrmasymen ázirlengen osy zań jobasy jemqorlyqpen kúresti odan ári kúsheıtýge baǵyttalyp otyr. Osy jolda zań jobasyna jemqorlyqpen kúresti júıeli túrde júrgizýge arnalǵan kóptegen ózgerister engizildi. Onyń basty maqsaty – kez-kelgen zań buzýdyń aldyn-alý jáne boldyrmaý, – dedi Nurlan Nyǵmatýlın.

Májilis depýtattary memleket basshysynyń tapsyrmasyna sáıkes, qylmystyń kez-kelgen túrin arandatqany úshin qylmystyq jaýapkershilikti sybaılas jemqorlyqqa qarsy organdardyń qyzmetkerlerine ǵana emes, jalpy kez kelgen quqyq qorǵaý organdarynyń qyzmetkerlerine belgileýdi usyndy.

Bas Prokýratýranyń, Sybaılas jemqorlyqqa qarsy is-qımyl agenttiginiń, Ishki ister jáne qarjy mınıstrlikteriniń ókilderi depýtattardyń bul usynysymen kelisip, qujat jobasy ekinshi oqylymǵa deıin pysyqtalatyn bolady.

Sonymen qatar, búgingi jalpy otyrysta májilis depýtattary kótergen taǵy bir másele óz sheshimin tapty. 

– Endi tek birinshi basshylar ǵana emes, kvazımemlekettik sektorda qyzmet etetin laýazymdy tulǵalar da jemqorlyq úshin jaýapqa tartylatyn bolady. Bul norma boıynsha da memleket basshysy Qasym-Jomart Kemeluly Toqaevtyń tapsyrmasy júzege asyrylady. Bul ádil jáne durys qadam dep esepteımin. Ony qoldaýymyz kerek, – dedi Nurlan Nyǵmatýlın.

Talqylaýdy qorytyndylaǵan májilis tóraǵasy osy zań jobasynyń nátıjesinde sybaılas jemqorlyqqa qarsy kúrestiń tıimdiligi artatynan atap ótti.

Sondaı-aq, zań jobasymen quqyq qoldaný praktıkasynda týyndaǵan quqyqtyq olqylyqtar men kollızııalardy joıýǵa, sybaılas jemqorlyqqa qarsy is-qımyl jónindegi ýákiletti organnyń mártebesi men uıymdyq qyzmetine qatysty máselelerdi retteýge baǵyttalǵan normalar bekitiledi.