Kenjehan Islámjanuly: Basty másele – halyqtyń amandyǵy men saýlyǵyn qamtamasyz etý

M. Áýezov atyndaǵy Ádebıet jáne óner ınstıtýtynyń dırektory Kenjehan Islámjanuly Prezıdent Qasym-Jomart Toqaevtyń tótenshe jaǵdaıǵa baılanysty jasaǵan málimdemesine pikir bildirdi. 

– Karantın rejıminiń sozylýy qazirgi ahýaldy kórsetip otyr. Elde koronavırýstyń beti tolyq qaıtqan joq. Sondyqtan da karantın merzimin 11-mamyrǵa deıin sozǵany durys boldy. Prezıdent málimdemesinde qazirgi jaǵdaıdyń ahýalyn taldaı otyryp, ony saýyqtyrýdyń da joldaryn tolyq qarastyrǵan. Ásirese úıde otyrǵan adamdardyń psıhologııalyq ahýalyn saýyqtyrý máselesi sóz boldy. Osyǵan baılanysty densaýlyq saqtaý mınıstrliginiń jumysyn qaıta qaraý jónindegi máselesiniń máni bar dep oılaımyn, – dedi K. Islámjanuly. 

Sonymen qatar óner ınstıtýtynyń dırektory kásiporyndardy iske qosý máselesin jáne olardyń qaýipsizdigin tolyqtaı qamtamasyz etýdi aıtty. 

– Qazir sharýashylyqtyń toqtap qalýy, kásiporyndardyń turyp qalýy jurtshylyqty alańdatyp otyrǵan úlken másele. Bul bizdiń elimizde emes álemdegi másele bolaıyn dep tur. Sondyqtan oblys, aýdan, aımaqtardaǵy kásiporyndardy birte-birte iske qosý qajet. Onyń kestesin jasaýdy jergilikti atqarý organdaryna tapsyrǵan durys. Biraq kásiporyndardy ashyp qana qoımaı, eń aldymen jumysshylardyń sanıtarlyq jaǵdaıyn, olardyń qaýipsizdigin tolyqtaı qamtamasyz etý qajet. О́ıtkeni qaýipti indettiń beti áli de qaıtqan joq. Eń basty másele – halyqtyń amandyǵy men saýlyǵyn qamtamasyz etý, – dedi K. Islámjanuly. 

Kenjehan Islámjanuly óz sózinde 4 mln-nan astam adamǵa 42 500 teńgelik kómek kórsetilip jatqanyn jáne áleýmettik tólemniń mamyr aıynda da beriletinin atap ótti. 

– 42 500 teńgelik áleýmettik tólem ekinshi qaıtara beriletin boldy. Bul – halyqqa berilgen úlken kómek. Biraq atalǵan kómektiń pármendiligin áli de arttyrý kerek. Árıne, bul kómekpen úlken másele sheshilmeıdi. Endigi kezekte orta jáne shaǵyn bıznesterdiń, jeke kásipkerlikpen aınalysatyn, ózderin tolyqtaı qamtamasyz etip otyrǵan adamdarǵa múmkindiginshe jaǵdaı jasaý qajet, – dep pikirin bildirdi. 

О́ner ınstıtýtynyń dırektory sóz sońynda qazaqstandyqtardy sabyrǵa shaqyryp, halqymyzdyń meıirimdiligi men qaıyrymdylyǵy osyndaı qıyn shaqta kórinetinin jáne kez kelgen dúnıege salqyndyq tanytyp, aqylmen qaraý qajettigin atap aıtty.