Almatyda dezınfeksııalaý jumystyranyń birinshi kezeńi aıaqtaldy

Koronavırýs indetinen kóz jumǵan naýqastardyń ólimine sozylmaly syrqattary da sebepker bolýda. Bul týraly Almaty qalasynyń Memlekettik bas sanıtarlyq dárigeri Jandarbek Bekshın onlaın-brıfıngte aıtty.

– 24 sáýirdegi jaǵdaı boıynsha ınfeksııadan 8 adam kóz jumǵan. Jasy 56-89 jas aralyǵyndaǵy 4 er jáne 4 áıel. Ortasha jastary – 66. Olarda qant dıabeti, semizdik, júrektiń ıshemııalyq aýrýy, arterııalyq gıpertenzııa, baýyr sırrozy sııaqty sozylmaly keselderi bolǵan. О́lim-jitim jaǵdaıyn zerdeleý maqsatynda qalada arnaıy komıssııa qurylǵan. Komıssııa músheleri tarapynan taldaýlar júrgizilip, ólimniń negizgi sebebi anyqtalady. Qaıtys bolǵan 5 naýqastyń ólimine sozylmaly aýrýlary sebepker bolǵan.  Infeksııadan saýyǵyp shyqqandardyń arasynda eki jaqty pnevmonııamen aýyratyndar boldy, ol naýqastardy emdeý kýrsy 14 kúnnen asyp jyǵyldy.  Sozylmaly aýrýlary bar naýqastardyń arasynda qaterli ınfeksııadan emdelip shyqqandar qazirgi tańda olar ambýlatorııalyq-emhanalyq qyzmet ókileriniń jiti baqylaýynda, – dedi J.Bekshın.

Sondaı-aq, spıker indet oshaǵy bolyp sanalatyn Ortalyq qalalyq klınıkalyq aýrýhanasynda atqarylyp jatqan saýyqtyrý sharalaryna toqtalyp ótti.

– Ortalyq qalalyq klınıkalyq aýrýhanasy jabylǵan kúnnen bastap biz onda saýyqtyrý is-sharalaryn júrgizip jatyrmyz. Birinshi kezekte zalalsyzdandyrý jumystaryna mán beriledi. Keshe dezınfeksııalaý jumystyranyń birinshi kezeńi aıaqtaldy. Usaq dıspersti búrký ádisterimen barlyq palata, emdeý-emshara jasaý bólmeleri, jalpy ǵımarat túgel dezınfeksııalandy. Búgin ekinshi kezeńi bastaldy. Sondaı-aq, jeldetý júıeleri zalalsyzdandyryldy. Ǵımarat kezeń-kezeńimen, tolyǵymen dezınfekııalanyp bitken soń, munda tek ınfeksııa juqtyrǵan naýqastar ǵana qabyldanatyn bolady. Eger qazirgideı tótenshe jaǵdaı májbúrlep jatsa, bul nysan provızorlyq ortalyq retinde de paıdalanylýy múmkin, – dedi J.Bekshın.