Qazaqstan Respýblıkasynyń Tuńǵysh Prezıdenti – Elbasynyń tóraǵalyǵymen Qaýipsizdik Keńesiniń otyrysy ótti

Qaýipsizdik Keńesiniń Tóraǵasy kúrdeli kezeńdi tabysty eńserýde qazirden bastap qolǵa alynǵan is-sharalar mańyzdy ról atqaratynyn atap ótti.

– Memleket basshysy men Premer-Mınıstr daǵdarysqa qarsy qajetti barlyq sheshim qabyldady. Elimizde tótenshe jaǵdaı jarııalanyp, karantın rejımi engizildi. Men barlyq azamattardy tótenshe jaǵdaı kezinde tıisti talaptardy oryndaýǵa shaqyramyn. Tarıhymyzda mundaı aýyrtpalyqtar talaı ret bolǵan. Biraq osy jolǵy qıyndyqtyń orny bólek. Árbir qazaqstandyq memlekettiń qamqorlyǵyn sezinýi úshin qoldan kelgenniń bárin jasap jatyrmyz. Sonymen qatar qazir biz aldyn-ala qamdanýymyz kerek. Álemniń burynǵydaı bolmasy anyq, - dedi Qazaqstannyń Tuńǵysh Prezıdenti.

Qaýipsizdik Keńesiniń Tóraǵasy memleket pen qoǵamda bolatyn ózgeristerge de toqtaldy.

– Birinshiden, barlyq el ózderiniń ekonomıkalyq strategııalaryn qaıta qarap jatyr. Munda ózin-ózi qamtamasyz etý, ózine tıesili resýrstarǵa úmit artý, óndiris pen qarjylyq tizbektiń senimdiligi alǵashqy orynda bolady. Ekinshiden, jańa salalyq basym baǵyttar qalyptasady. Tıimsiz sektorlar múlde joıylyp ketedi. Ekonomıkalyq ósimniń kóshin tyń salalar bastaıyn dep tur. Olar ekonomıkany ilgeriletip, adamdardy jumyspen qamtıdy. Úshinshiden, barlyq aýqymdy daǵdarystar tehnologııalyq jáne ekonomıkalyq álemdik tártiptiń sıkldik ózgerýimen baılanysty. Qazir eski modeldiń kúıregenin kórip otyrmyz, – dedi Nursultan Nazarbaev.

Elbasy jahandyq syn-qaterlerdi eńserý úshin Qazaqstanda barlyq qajetti resýrstar bar ekenin atap ótti.

– О́tken jyldary biz shıkizatqa táýeldilikti azaıtý úshin tabandy jumys istedik. Sondyqtan damýdyń barlyq negizgi baǵyttary boıynsha arnaıy baǵdarlamalar ázirlendi. Indýstrııalandyrý, shaǵyn jáne orta bıznesti damytý, ınfraqurylymdyq damý, aýyl sharýashylyǵy, áleýmettik baǵdarlamalar júzege asyryldy. Olarǵa úlken resýrs bólindi. Biz Ulttyq qorǵa qomaqty qarajat jınadyq. Endi daǵdarys kezinde onyń elge paıdasy tıip jatyr. Alaıda qordaǵy qarjy sheksiz emes, ony únemdi jáne eń qıyn jaǵdaıda ǵana paıdalaný kerek, – dedi Qazaqstannyń Tuńǵysh Prezıdenti.

Qaýipsizdik Keńesiniń Tóraǵasy áleýmettik-ekonomıkalyq damýda erekshe ádis-tásilderdi qoldanýdyń mańyzdylyǵyn atap ótti.

– Birinshi kezekte daǵdarysqa qarsy keshendi sharalardy júzege asyrýymyz kerek. Kórsetilip jatqan kómektiń bıznes pen halyqqa jetýi úshin bólingen ár teńgeni qadaǵalaý qajet. Qazirdiń ózinde ekonomıkany qalpyna keltirý jáne daǵdarystan keıingi kezeńde damý baǵdarlamasyn iske asyrýǵa kirisken jón. Ekonomıkanyń negizgi salalarynyń, bolashaq ekonomıkasynyń, qarjy jáne áleýmettik salanyń, qalalar men aýyldardyń damý baǵyttaryn anyqtap alý mańyzdy, – dedi Nursultan Nazarbaev.

Elbasy daǵdarysqa qarsy sharalardy júzege asyrý úshin barlyq deńgeıdegi memlekettik organdardyń tıimdi jumysyn qamtamasyz etý qajettiligine toqtaldy.

– Qazaqstandy tıimdi korporasııa retinde qarastyratyn sát týdy. Ol strategııalyq ári operasııalyq naqty josparǵa sáıkes biryńǵaı ortalyqtan basqarylýǵa tıis. Aýyl ákiminen bastap Úkimet múshesine deıingi memlekettik qyzmetshiniń bári óz jumysyn qaıta pysyqtap, naqty nátıjelerge qol jetkizýi qajet. Elge ekonomıkany qalpyna keltirý, jumyssyzdyqty azaıtý, halyqty azyq-túlikpen jáne qajettiniń bárimen qamtamasyz etý úshin tıimdi ári batyl sheshim qabyldaı alatyn menedjerler kerek, – dedi Qazaqstan Respýblıkasynyń Tuńǵysh Prezıdenti.

Qorytyndylaı kele, Qaýipsizdik Keńesiniń Tóraǵasy 2020 jylǵy daǵdarystan keıingi elimizdiń damý jolyn der kezinde oılastyrý bul qıyndyqty jeńip shyǵýǵa kómek berip qana qoımaı, búkil memleket úshin paıdasy tıetindigin atap ótti.

– Biz bul daǵdarysty da jeńetinimizge senimdimin. Ákimder men mınıstrler tikeleı jaýap beredi. Úkimet barlyq memlekettik baǵdarlamalar men daǵdarysqa qarsy is-sharalardyń tıimdi oryndalýyn baqylaýdy qamtamasyz etýi qajet. Men barsha qazaqstandyqtardy qabyldanǵan sharalardy qoldaýǵa, birlikke jáne tártipti saqtaýǵa shaqyramyn. Munyń bári halyqtyń múddesi úshin jasalyp jatyr, – dedi Nursultan Nazarbaev.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir