Qanat Jumabaev: Prezıdenttik ınstıtýty Qazaqstandaǵy turaqtylyqty qamtamasyz etti

Qazaqstanda prezıdenttik ınstıtýttyń engizilgenine 30 jyl tolýyna oraı onlaın rejımde halyqaralyq ǵylymı-tájirıbelik konferensııa ótip jatyr, dep habarlaıdy QazAqparat.

«Prezıdenttik basqarý nysany. Konstıtýsııalyq negiz jáne saıası tájirıbe» atty halyqaralyq onlaın konferensııada alǵashqylardyń biri bolyp Qazaqstannyń Tuńǵysh Prezıdenti – Elbasy qorynyń atqarýshy dırektory Qanat Jumabaev sóz sóıledi.

– Elimizdiń tarıhynda prezıdenttik ınstıtýttyń mańyzy zor. Myqty prezıdenttik basqarý ınstıtýty elimizdi saıası, ekonomıkalyq jáne áleýmettik modernızasııany sátti iske asyrýǵa jaǵdaı jasap, el ishindegi turaqtylyq pen birlikti qamtamasyz etti. Búgin de jahandyq koronavırýs pandemııasy álemdegi saıası ınstıtýttar úshin úlken synaqqa aınaldy. Qazirgi tańda jahandyq deńgeıdegi saıası qurylym modelderi talqylanyp jatyr. Osy rette Qazaqstandaǵy prezıdenttik ınstıtýttyń ózekti baǵasyn berý – óte mańyzdy, – deıdi Elbasy qorynyń atqarýshy dırektory onlaın konferensııa barysynda.

Qanat Jumabaevtyń aıtýynsha, Nursultan Nazarbaev naryq ekonomıkasyna kóshý, demokratııalyq qoǵam qurý, ulttyq ózin-ózi damýdy qalyptastyrý – toqsanynshy jyldary memleketimizdiń negizgi maqsat-mindetterine aınalǵan.

– Táýelsizdik alǵan jyldary Elbasynyń qatysýymen kóptegen mańyzdy sheshim qabyldandy. Konstıtýsııa qabyldanyp, ulttyq valıýta engizildi, Qarýly kúshter jasaqtalyp, ulttyq qor jasaldy. Ulttyq qor – bolashaq urpaq úshin qaýipsizdik kepili. Kórip otyrǵanymyzdaı bul óte dana sheshim. Tuńǵysh Prezıdent el basqarǵan jyldary Qazaqstan óte jaýapty ári qurmetti halyqaralyq qaýymdastyq múshesine aınaldy. Túrki keńesiniń negizin qalaýshy atandy. Sol sebepti prezıdenttik basqarý formasy – Qazaqstannyń memlekettigi tarıhynda óte mańyzdy ekenin atap ótý kerek, – dedi ol.