"4 mıllıonnan astam qazaqstandyq 42500 alǵan"

Tótenshe jaǵdaı kezinde tabysynan aıyrylǵan 4,1 mıllıonnan astam adamǵa áleýmettik tólem taǵaıyndaldy, dep habarlaıdy Eńbek jáne halyqty áleýmettik qorǵaý mınıstrliginiń baspasóz qyzmeti. 

23 sáýirdegi jaǵdaı boıynsha tótenshe jaǵdaı kezinde kiristen aıyrylýǵa baılanysty Memlekettik áleýmettik saqtandyrý qorynan 4 mln 146 myń áleýmettik tólem taǵaıyndaldy. Onyń ishinde alǵashqy aıda – 3 mln 727,5 myń, ekinshi aıda - 418,5 myń.

23 sáýirdegi jaǵdaı boıynsha «42 500 teńge» tólemge 8 mln 21 myń adam ótinish berdi. Biregeı ótinishterdiń eń kóp sany kelesi óńirlerde:

- Almaty oblysy – 1 mln 44,8 myń;
- Túrkistan oblysy – 998,9 myń;
- Almaty q. – 896,2 myń;
- Nur-Sultan q. – 594,5 myń;
- Shymkent q. – 534,4 myń.

О́ńirler boıynsha kelesi oblystardyń turǵyndaryna járdemaqy eń kóp taǵaıyndalǵan:
- Almaty oblysy – 603,4 myń;
- Túrkistan oblysy – 496,6 myń;
- Almaty q. – 403,1 myń.

Kelip túsken 3 mln 585 myń ótinim boıynsha 42 500 teńge taǵaıyndaýdan bas tartyldy, sebebi olar TJ kezinde tabystyń joǵalýyna baılanysty MÁSQ-dan áleýmettik tólemdi taǵaıyndaý qaǵıdalaryna sáıkestigin tekserýden ótpegen.

Bas tartýdyń negizgi sebepteri mynadaı:

- ótinish berýshiniń jeke derekteriniń durys kórsetilmeýi;
- banktik shot nómiriniń durys kórsetilmeýi;
-ótinish berýshide turaqty jalaqysynyń bolýy (onyń ishinde memlekettik qyzmetkerler men bıýdjettik uıymdardyń qyzmetkerleri);
- ótinish berýshiniń tótenshe jaǵdaı engizilgenge deıin resmı jumys jasamaǵan zeınetaqy men járdemaqy alýshy bolyp tabylýy;
- ótinish berýshi úshin tótenshe jaǵdaı rejımin engizgenge deıin sońǵy

12 aı ishinde mindetti áleýmettik aýdarymdardyń, zeınetaqy jarnalarynyń júrgizilmeýi, BJT tólemeý nemese beıresmı ózin-ózi jumyspen qamǵandardyń ótinish bergenge deıin BJT tólemeýi; - ótinish berýshiniń qaıtys bolýy nemese Qazaqstan Respýblıkasynyń aýmaǵynan tys jerge turaqty turýǵa ketýi.