• USD 468.56

  • EUR 497.56

  • RUB 7.3

  • CNY 67.18

28 Naýryz, 22:20:33
Almaty
+35°

Memleket basshysy koronavırýs pandemııasyna baılanysty jarııalanǵan Tótenshe jaǵdaı kezinde eki aptanyń ishinde salynǵan elordadaǵy modýldi juqpaly aýrýlar aýrýhanasyna bardy.

Medısınalyq mekemeniń jalpy aýmaǵy 7 myń sharshy metrdi quraıdy. Onyń qurylysyna respýblıkalyq bıýdjetten 5,5 mıllıard teńge bólindi. Medısınalyq nysandy «BI Group» kompanııalar toby saldy.

Aýrýhana ǵımaraty tez qurastyrylatyn qurylys tehnologııasyn paıdalana otyryp, modýldik bloktardan turǵyzyldy. 200 orynǵa eseptelgen aýrýhana medısına qyzmetkerleri men em alýshylardyń qaýipsizdigin qamtamasyz etetin zamanaýı quraldarmen jabdyqtalǵan.

Densaýlyq saqtaý mınıstri Eljan Birtanov Prezıdentke indetke qarsy kúrestegi medısınalyq kómektiń problemalary men ony jetildirý joldary týraly baıandady. Memleket basshysy naýqastardy emdeýge qajetti barlyq quraldarmen jabdyqtalǵan emdeý bólimsheleri men palatalardy aralap kórdi.

«BI Group» qurylys holdıngi Dırektorlar keńesiniń tóraǵasy Aıdyn Rahymbaev Qasym-Jomart Toqaevqa qurylys jumystarynyń barysy men aýrýhananyń erekshelikteri týraly aıtty.

Memleket basshysy atalǵan aýrýhananyń mundaı tıptegi elimizdegi alǵashqy medısınalyq mekeme ekenin atap ótip, ǵımaratty salǵan qurylysshylarǵa rızashylyǵyn bildirdi.

Qazaqstan Prezıdenti dárigerlermen áńgimelesý barysynda otandastarymyzdyń densaýlyǵyn saqtaý úshin qajyrly eńbek etip jatqan medısına qyzmetkerlerine alǵys aıtty.

– Sizder pandemııamen kúreste aldyńǵy shepte jumys istep júrsizder. Sizderge rızashylyǵymyz sheksiz. Kúndiz-túni tynbaı eńbek etip jatyrsyzdar. О́kinishke qaraı, Almatyda dárigerlerimizdi indetten qorǵaı almadyq. Qazir qalyptasqan Tótenshe jaǵdaıdy joıý úshin kúresýdemiz. Sondyqtan abaı bolǵandaryńyz jón, eń aldymen, óz densaýlyqtaryńyzdy saqtańyzdar, – dedi memleket basshysy.

Qazaqstan Prezıdenti azamattarymyzdyń densaýlyǵyn saqtaý memlekettiń aldyndaǵy basty mindet ekenine toqtaldy. Onyń aıtýynsha, búgingi daǵdarystan densaýlyǵy myqty ult qana aman-esen shyǵady.

– Keshendi sharalar qabyldaý kerek. Biz postkeńestik keńistikte qajetti sharalardy eń alǵashqylardyń biri bolyp qabyldadyq. Azamattarymyzǵa karantın rejımin saqtaýdyń ońaı emes ekenin túsinemin. Biraq budan basqa jol joq. Qalaı bolǵanda da osy aıdyń aıaǵyna deıin karantın rejımin saqtaımyz. Arǵy jaǵyn taǵy da qarastyramyz. Múmkin, máseleni retteýdiń jańa ádisteri tabylar. О́ıtkeni halyq birtindep úılerinen shyǵýy kerek, – dedi Qasym-Jomart Toqaev.

Memleket basshysy ekonomıkany qoldaýdyń mańyzdylyǵy jaıynda da aıtty.

– Ekonomıkalyq damý, shaǵyn jáne orta bıznes týraly da oılaný kerek. Kúndelikti eńbek etip, tirshiligin jasap jatqan halyq óz múmkindikterinen aıyrylyp qalmaýy qajet. Bul jóninde kelesi aptadaǵy televızııalyq úndeýimde egjeı-tegjeıli aıtamyn, – dedi prezıdent.

Qasym-Jomart Toqaev dárigerlermen áńgimelesý kezinde sanıtarlyq-epıdemıologııalyq qyzmet júıesin reformalaý máselesine toqtaldy.

– Árbir daǵdarystyń óz sabaǵy bolady. Ony eskerý kerek. Biz qazirgi daǵdarys pen pandemııadan sabaq alyp jatyrmyz. Shyn máninde, sońǵy jyldary sanıtarlyq-epıdemıologııalyq qyzmet júıesin damytýǵa jáne ony qoldaýǵa tıisti dárejede kóńil bólinbedi. Árıne, onyń belgili bir sebepteri bar. Ony sizder jaqsy bilesizder. Biz qazir Densaýlyq saqtaý mınıstrliginiń jumysyn qaıta qalyptastyryp jatyrmyz. Qajetti reformalar júrgiziletin bolady. Atap aıtqanda, Bas sanıtarlyq dárigerdiń ókilettigi kúsheıtiledi, – dedi memleket basshysy.

Medısına qyzmetkerleri qoldaý kórsetkeni úshin memleket pen Prezıdentke alǵys aıtty. Sondaı-aq olar dáriger-ınfeksıonısterdiń eńbek aqylaryn arttyrý máselesin kóterdi.

– Biz qazir bıýdjettiń barlyq qarajatyn shoǵyrlandyryp jatyrmyz. Sizder Qazaqstannyń osyǵan deıin qalyptasqan dástúrli naryǵynyń quldyraǵanyn túsinýge tıissizder. Bıýdjetke túsýge tıisti qarjynyń negizgi bóligin tolyq ala almaı otyrmyz. Degenmen osyndaı kúrdeli qarjylyq qıyndyqtarǵa qaramastan, sizderdiń ótinishterińizdi qaraýsyz qaldyrmaımyz, – dedi Qasym-Jomart Toqaev.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir