22 Sáýir, 2020 NEWS

TJ kezinde qazaqstandyqtar pitir sadaqasyn mobıldik qosymshalar arqyly berýine bolady

orgpage.ru

QMDB  tóraǵasynyń orynbasary Ershat Ońǵarov tótenshe jaǵdaı kezinde qazaqstandyqtar pitir sadaqasyn mobıldik qosymshalar arqyly berýine bolatynyn aıtty. Bul týraly Almaty.tv habarlady.

Bıylǵy jyly pitir sadaqanyń mólsheri 370 teńge dep bekitildi. Onyń quny eki keli unnyń respýblıka boıynsha eseptegende naryqtyq ortasha baǵasymen shyǵaryldy. Bul – eń tómengi mólsheri. Alaıda materıaldyq jaǵdaıy bar azamattar meıiz nemese qurma qunymen berse de bolady. Al, tótenshe jaǵdaı men karantın rejıminde pitir sadaqany úıden shyqpaı-aq berý úshin múmkindik bar.  

– Ramazan aıynda beriletin pitir sadaqasy men zeketti Kaspıı banki jáne Halyq banki, kıvı mobıldi qosymshalary arqyly aýdarýǵa bolady. Qazirgi tańda basqa da banktermen kelissózder júrgizilip jatyr. Qazaqstan musylmandary dinı basqarmasy belgili bir bankti jarnamalamaıdy. Alaıda myna tótenshe jaǵdaıda úıden shyqpaı, sadaqa berýdiń osyndaı ońtaıly jolyn tańdap otyrmyz, – dedi  naım múftı Ershat OŃǴAROV.

Ulyq meıramda muqtaj otbasylarǵa qalaı kómektesýge bolatyny da sóz boldy. Máselen, aýyzasharǵa ketetin qarjyny aýdarý arqyly qoldaý kórsetýge bolady.  

– Aýyz bekitken jandarǵa azyq-túlik jetkizip berseńiz de, aýyz ashtyrǵannyń saýabyn alasyz. Tipti kómekke muqtaj otbasylarǵa aýyz asharǵa ketetin shyǵyndy berip, qarjylaı qoldaý kórsetseńiz de mol saýapqa kenelesiz, – dedi  QMBD tóraǵasy, Bas múftı Naýryzbaı qajy TAǴANULY.

Qazaqstan musylmandary dinı basqarmasynyń ókilderi oraza kezinde týys, kórshi-qolańǵa aýyzasharǵa barýdan bas tartyp, oqshaýlanýǵa shaqyrdy. Biraz sabyr etip, qıyndyqty ótkergen kezde bir-birimizdi qonaqqa shaqyramyz dedi. Al oraza tutqandarda koronavırýs belgileri paıda bolsa ne isteý kerektigi de aıtyldy.

– Tótenshe jaǵdaıdy eskere kele, mundaı jaǵdaıda eger senimdi dáriger belgili bir aǵzanyń zaqymdanýy, jańa aýrýdyń paıda bolýy jáne aýrýdyń asqyný qaýpi kúsheıetinine, sondaı-aq,bilikti ári ádiletti musylman dárigeriniń keńesimen oraza ustamaýǵa ruqsat etiledi. Koronavırýsqa qatysty ımmýnıtettiń álsirep, sımptomdary paıda bosla, onda orazasyn toqtatyp, basqa kúnderi orazasyn, qazasyn óteýine ruqsat etiledi, – dedi  QMDB tóraǵasynyń orynbasary, naım múftı Ershat OŃǴAROV.

Sonymen qatar aýyz bekitkenderge antıseptıkalyq quraldar men spırt qoldanýǵa bolatynyn atap ótti.

– Olar orazany buzbaıdy. Sebebi qazir tótenshe jaǵdaıdamyz, sondyqtan vırýs kezinde densaýlyǵyna zııan keltirmeı, qaıta ony qorǵaıtyn dúnıelerdi qoldaný qajet, muny sharıǵatymyz qoldaıdy,  – dedi Bas múftı.  

Ilmek sózder: Qazaqstan Oraza

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir