22 Sáýir, 2020 NEWS

Vıse-mınıstr qyzmetinen bosatylǵan Kamaljan Nadyrovtan koronavırýs anyqtaldy

primeminister.kz

Qazaqstannyń densaýlyq saqtaý vıse-mınıstri qyzmetinen bosatylǵan Kamaljan Nadyrovtan koronavırýs ınfeksııasy anyqtaldy. Bul týraly densaýlyq saqtaý mınıstri Eljan Birtanov Facebook jelisinde jazdy.

– Keshe Úkimet qaýlysymen Kamaljan Talǵatuly Nadyrov basqa jumysqa aýysýyna baılanysty Densaýlyq saqtaý vıse-mınıstri qyzmetinen bosatyldy. Almaty qalasynda koronavırýstyq ınfeksııa keńinen tarap, jaǵdaı qıyndaǵan soń Qoǵamdyq densaýlyq saqtaý basqarmasynyń qazirgi basshysy Tileýhan Shildebaıuly Ábildaev otstavkaǵa ketý týraly ótinish bildirgen bolatyn. Qaladaǵy komandany kúsheıtý maqsatynda basqarma basshysy laýazymyna K.T. Nadyrovty taǵaıyndaý josparlanǵan edi. Alaıda keshe keshkisin K.T. Nadyrovqa koronavırýstyq ınfeksııa juqtyrǵan degen dıagnoz qoıyldy, qazir ol emdelý úshin aýrýhanaǵa jatty, – dep jazdy mınıstr.

Sonymen qatar, mınıstr áriptesi Kamaljan Talǵatulyna tez saýyǵyp ketýine tilektes ekenin jáne qoldaý bildiretinin aıtty.

Osy jaǵdaıǵa baılanysty Almaty qalasy ákiminiń kelisimimen T.Sh. Ábildaevtyń otstavkaǵa ketý týraly ótinishi toqtatylǵan.

– Jalpy, Almatydaǵy COVID-19-ǵa qatysty jaǵdaı memleket jáne qala basshylyǵynyń erekshe baqylaýynda. Búgin tańǵy málimet boıynsha munda jalpy 678 adamnyń ınfeksııa juqtyrǵany anyqtaldy, skrınıng nátıjesinde naýqastardyń jartysyna jýyǵy medısına qyzmetkerleri ekeni belgili boldy. Ortalyq qalalyq klınıkalyq aýrýhanadaǵy indettiń oshaǵy oqshaýlandyryldy, barlyq pasıentter, koronavırýstyq ınfeksııa dıagnozy rastalǵan qyzmetkerler qaladaǵy stasıonarlarǵa ornalastyryldy jáne emdelýde. Atalǵan aýrýhananyń ǵımarattary tolyq dezınfeksııalanady, stasıonar sodan keıin ǵana naýqastardy qabyldaýǵa kirisedi, – dep jazdy Birtanov.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir