18 Sáýir, 2020 NEWS

Almatynyń bas sanıtary qyzmetten ketip, ornyna eldiń burynǵy bas sanıtary taǵaıyndaldy

qamshy.kz

Almaty qalalyq taýarlar men qyzmetter sapasy men qaýipsizdigin baqylaý departamentiniń basshysy, qalalyq bas sanıtarlyq dáriger Aızat Moldaǵasymova qyzmetten ketip onyń ornyna eldiń burynǵy bas sanıtar dárigeri Jandarbek Bekshın taǵaıyndaldy.

Aızat Moldaǵasymova sońǵy ýaqytta birneshe daýly oqıǵanyń ortasynda júrdi. Ol medısına qyzmetkerleriniń jappaı koronavırýs juqtyrý dereginiń bir sebebi dárigerlerdiń saqtyq sharalaryn saqtamaýy ekenin aıtyp, kináni mamandardyń ózine artqan.

Sanıtarlyq dárigerdiń bul sózderin №12 Ortalyq qalalyq klınıkalyq aýrýhananyń medqyzmetkerleri "negizsiz aıyptaý" dep, departament basshysynyń otstavkasyn talap etti. Sondaı-aq atalǵan aýrýhananyń gınekologııa bóliminiń meńgerýshisi Gaýhar Ámireeva men taǵy 33 dáriger Aızat Moldaǵasymovany sotqa beretinin aıtqan.

Oqıǵaǵa baılanysty DSM mamandarynan arnaıy komıssııa qurylyp, epıdemıologııalyq tekserý bastalǵan. Densaýlyq saqtaý vıse-mınıstri Kamaljan Nadyrov sanıtarlyq dárigerdiń sózinde qandaı da bir zań buzýshylyq anyqtalsa, tıisinshe jaýapqa tartylatynyn aıtqan.

Al buǵan deıin burynǵy bas sanıtarlyq dáriger koronavırýs juqtyrǵan jolaýshymen bir reıste kelip, 14 kún karantınge oqshaýlanǵan bolatyn. Artynsha jınalystarǵa qatysyp, ashyq júrgeni úshin qalalyq Qoǵamdyq keńes tarapynan synǵa ushyraǵan. 

Ol bul qyzmetke 2017 jyly kelgen.

Aızat Moldaqasymovany almastyrǵan Jandarbek Bekshın qoǵamda qyzý talqyǵa túsken sózinen soń kóp uzamaı eldiń bas sanıtar dárigeri qyzmetinen ketken. Ol bas sanıtar bolyp turǵanda "bizdiń boljamymyzsha, 11-16 naýryz aralyǵynda elge koronavırýs aqyry keledi" dep sózden súringen bolatyn.

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir