17 Sáýir, 2020 NEWS

Qazaqstanda Covid-19 vırýsyn juqtyrǵan júkti áıel bosandy

Kórneki sýret

Almatyda Covid-19 vırýsyn juqtyrǵan júkti áıel deni saý bala bosandy. Bul týraly densaýlyq saqtaý mınıstrligi habarlady.
 
13 sáýirde ekiqabat áıel júktiliginiń 39-shy aptasynda vırýs juqtyrǵan naýqaspen baılanysta bolǵan adam retinde №1 Qalalyq klınıkalyq aýrýhanasyna jetkizildi. Júkti áıelden koronavırýsqa qarsy analız alynyp, nátıjesi oń bolyp shyqty. 15 sáýirde dárigerler analız kórsetkishteri boıynsha oǵan kesar tiligi otasyn jasap, bosandyryp alady. Nátıjesinde salmaǵy 3,5 keliden asatyn ul bala dúnıege keldi. Bul naýqastyń ekinshi bosanýy eken.

– Jańa týǵan náresteden alynǵan taldaýlar teris nátıje kórsetti. Náresteniń deni saý. Qazir ol balalar bólimshesinde jatyr, – dedi Almaty qalasy Qoǵamdyq densaýlyq basqarmasynyń basshysy Tileýhan Ábildaev.

Bosanǵan áıeldiń jaı-kúıi qanaǵattanarlyq. Jýyrda ol emdelýin jalǵastyrý úshin ınfeksııalyq stasıonarǵa aýystyrylady. Naýqas qaýipti indetten tolyq saýyǵyp shyqqannan keıin ǵana ulymen qaýysha alady.

Aıta ketý kerek, №1 Qalalyq klınıkalyq aýrýhanada provızorlyq ortalyq qurylǵan. Bul aýrýhanada qaýipti indetti juqtyrǵan júkti áıelder bosanady.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir