16 Sáýir, 2020 NEWS

Toqaev: Kóbi patrıotızm týraly kóp áńgime aıtady, biraq naqty iske kelgende buǵyp qalady

Aqorda

Qazaqstan prezıdenti, Qarýly kúshterdiń joǵarǵy bas qolbasshysy Qasym-Jomart Toqaev elordada áskerı jıynǵa shaqyrylǵan aýmaqtyq qorǵanys brıgadasynyń áskerı qyzmetshilerimen kezdesti dep jazady Qamshy.kz aqparat agenttigi Aqordanyń deregin negizge alyp. Sondaı-aq Qarýly Kúshterdiń tehnıkalyq daıyndyǵyn jáne qala ákimdiginiń Tótenshe jaǵdaıdy qamtamasyz etý jónindegi jumysyn tekserdi.

Qorǵanys mınıstri Nurlan Ermekbaev Qarýly Kúshterdiń joǵarǵy bas qolbasshysyna elimizdegi áskerı qyzmetin óteýge mindetti azamattardy arnaıy jıynǵa shaqyrý barysy, koronavırýs pandemııasyna qarsy kúreste áskerı qyzmetshilerdiń tehnıkalyq jáne jaýyngerlik jabdyqtalýy týraly baıandady.

Nur-Sultan qalasynyń ákimi Altaı Kólginov elordanyń qazirgi ahýaly, onyń ishinde, azyq-túlikpen, medısınalyq qorǵanys quraldarymen qamtamasyz etý, qalada dezınfeksııa jumystaryn júrgizý, qosymsha juqpaly aýrýlar aýrýhanasyn salý jaıynda egjeı-tegjeıli esep berdi.

Qasym-Jomart Toqaev mınıstr men ákimniń esepterin tyńdaǵannan keıin dezınfeksııalaý jumystaryna erekshe mán berýdi tapsyrdy. Mundaı jumystar, ásirese, iri qalalarda keń kólemde júrgizilýi kerek.

 – Nysandardy kúzetý, kóshedegi tártipti saqtaý asa mańyzdy mindet ekeni túsinikti. Degenmen, qazirgi jaǵdaıda basty mindet – dezınfeksııa jasaý. Bul – óte qaýipti vırýs. Sondyqtan dezınfeksııa jasamasa, eshqandaı oń nátıje bolmaıdy, – dedi prezıdent.

Memleket basshysy Tótenshe jaǵdaı rejıminiń barlyq talaptaryn buljytpaı oryndaý qajet ekenin aıtty.

– Shaǵyn bıznesti shyǵaramyz dep jatyrmyz. Jalpy qalanyń turǵyndary karantın rejımin mindetti túrde saqtaýy kerek. Onsyz bolmaıdy, – dedi Qasym-Jomart Toqaev.

Memleket basshysy áleýmettik mindettemelerdi oryndaýdyń jáne medısına qyzmetkerlerine syıaqy tóleýdiń mańyzdy ekenin atap ótti. Sonymen qatar jańa juqpaly aýrýlar emhanasyn salý máselesine arnaıy toqtaldy.

– Kelesi aptada atalǵan emhanany baryp kóremiz. Bul emhana óte qysqa merzimde salynyp jatyr. Onyń qurylysy bar-joǵy eki aptanyń ishinde bitýi kerek. Eń aldymen, onyń sapasyna erekshe mán berý qajet, – dedi prezıdent.

Qasym-Jomart Toqaev jıynǵa shaqyrylǵan áskerı qyzmetshilerdiń aldynda sóılegen sózinde olardyń el úshin qyzmet etýge kelgenderine rızashylyǵyn bildirdi.

– Barshańyzǵa shynaıy alǵysymdy bildiremin. Sizder óte mańyzdy jumys atqaryp jatsyzdar. Bul – naǵyz patrıotızmniń kórinisi. Qazir adamdardyń kóbi patrıotızm, Otanǵa degen súıispenshilik týraly kóp áńgime aıtady. Biraq naqty iske kelgende buǵyp qalady. Al sizder elimiz, Otanymyz úshin óz erikterińizben osynda qyzmet etýge kelip otyrsyzdar. Sondyqtan barshańyzǵa shyn júrekten alǵys aıtamyn, – dedi Joǵarǵy Bas qolbasshy.

Prezıdent halqymyzdyń osy ýaqytsha qıyndyqty eńseretinine senim bildirdi.

– Qazirgi ahýal kúrdeli. Biraq bárimiz bir ult, bir halyq bolyp osy qıyndyqtardy jeńip shyǵatynymyzǵa eshqandaı kúmánim joq. Bári jaqsy bolady. Biz, eń aldymen, qarapaıym halyqqa kómek kórsetip jatyrmyz. Bıýdjetten, Ulttyq qordan qyrýar qarjy bólindi. Eń aldymen bizdiń aldymyzda turǵan maqsat – qarapaıym halyqqa koldaý kórsetý. Halyqsyz eshqandaı ekonomıka bolmaıdy. Sondyqtan patrıotızm degen bul qasıetti uǵymdy naqty ispen dáleldeý kerek, – dedi Qasym-Jomart Toqaev.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir