Almatyda ınfeksııa juqtyrǵan medısınalyq qyzmetkerlerge qyzmettik tergeý júrgiziledi

Almaty qalasynyń óńirlik kommýnıkasııalar qyzmeti alańynda ótken brıfıng barysynda densaýlyq saqtaý vıse-mınıstri Qamaljan Nadyrov medısına qyzmetkerleriniń koronavırýstyq ınfeksııany juqtyrýymen baılanysty jaǵdaıǵa túsinikteme berdi.

Buǵan deıin medısına qyzmetkerleri arasynda koronavırýstyq ınfeksııany juqtyrý faktileri týraly habarlanǵan bolatyn.

Densaýlyq saqtaý vıse-mınıstriniń aıtýynsha, búgin osy jaǵdaı boıynsha jumys komıssııasy qurylyp, qyzmettik tekserý júrgizilýde.

Oǵan qosa, Q. Nadyrov Almaty qalalyq ortalyq klınıkalyq aýrýhanasynyń bas dárigerin jumystan bosatý týraly jaǵdaıǵa túsinikteme berdi. Medısınalyq uıymnyń basshysy – qoǵamdyq densaýlyq basqarmasynyń quzyryndaǵy shtattyq birlik.

– Meniń bilýimshe, bas dáriger óz erkimen ótinish jazdy. Biz sizdermen quqyqtyq memlekette ómir súrip jatyrmyz. Eńbek kodeksin de, memlekettik qyzmetkerge degen qarym-qatynasty da eshkim alyp tastaǵan joq. Sondyqtan, eger bireýde qandaı da bir suraq týyndaǵan bolatyn bolsa, biz olardy quqyqtyq alańda qarastyrýymyz kerek, – dep túsindirdi ol.

Medısına qyzmetkerleriniń ınfeksııa juqtyrýy múmkin degen sebeptiń biri – ınfeksııa naýqastan dárigerge nemese dárigerden naýqasqa berilgen bolýy kerek. Epıdemıolog mamandardyń aıtýynsha, medısınalyq uıymdar qaýip-qater aımaǵynda jumys isteıtindikten, aýrýhanaishilik ınfeksııanyń berilý jaǵdaıynyń bolmaýy múmkin emes.

– Oryn alǵan jaǵdaılar, ókinishke oraı, medısına qyzmetkerleri arqyly da berilýi múmkin. Nemese kerisinshe, eger epıdemıologııa normalary saqtalmaı, medısınalyq uıym ishindegi logıstıkanyń buzylýy saldarynan bolýy da ǵajap emes. Sondyqtan bul jáıtterge sabyrmen jáne túsinistikpen qaraý kerek. Bizdiń mindetimiz – oryn alǵan jaǵdaıdyń sebebi men saldaryn tabý. Taǵy da aıtaıyn, bul jaǵdaı Densaýlyq saqtaý mınıstrliginiń jeke baqylaýynda, – dedi Q. Nadyrov.

Qorytyndylaı kele, Q. Nadyrov medısınalyq uıymdarda qyzmetkerlerdiń sanıtarlyq-epıdemıologııalyq qaýipsizdik sharalaryn saqtaýyna baqylaý júrgiziletinin atap ótti. Gospıtal ishindegi qaýipsizdikti baqylaýdy saqtaý – bul epıdemııa men pandemııa kezeńindegi negizgi talaptardyń biri – dedi ol.