Almatyda júrip-turý ruqsaty portal arqyly alynady

Almatyda júrip-turý ruqsatyn portal arqyly alady. Bul onlaın-brıfıngte shahar basshysynyń birinshi orynbasary Saparbek Tuıaqbaev málimdedi.

Aıtýynsha, budan bylaı tótenje jaǵdaıy rejımi kezinde Almatyda júrip-turý ruqsaty portal arqyly berilmek. Bul saıt 14 sáýirde iske qosylady.

– Jedel shtabtyń sheshimimen qaladaǵy birqatar kásiporyndarǵa jumys isteýge ruqsat berildi. Bul kásipkerlerdiń júrip-turýyna ruqsat ótken aıda berildi. Sondaı-aq qalanyń qalypty tirshiligin qamtamasyz etýge qatysy bar tulǵalardyń derekter bazasy quryldy. Biraq tájirıbe kórsetkendeı, keıbir kásipkerler múmkindikti paıdalanyp, óz kásiporyndarynyń tizimine keıbir avtomobılder men osy jumysqa múldem qatysy joq adamdardy engizgen. Sondyqtan ashyqtyqty qamtamasyz etý maqsatynda biz jańa portal ázirledik, – dedi S. Tuıaqbaev.

Bul rette atalǵan saıt kásiporyn qyzmetiniń ruqsat etilmegen túrlerin anyqtap otyrýǵa septigin tıgizbek.

– Máselen bir kásiporynda 50 adam jumys isteıdi delik. Endeshe portal bul mekemeden 50-den astam adamdy qabyldamaıdy. О́tinim mekemeniń birinshi basshysynyń ESQ-sy arqyly qabyldanady. Bul oǵan jeke jaýapkershilik júkteıdi. Jalǵan aqparat bergen jaǵdaıda jaýapqa birinshi basshy tartylady, – dedi Saparbek Tuıaqbaev.

Aıta ketý kerek, bul portal infoalmaty.kz meken-jaıy boıynsha qoljetimdi bolmaq. Sizdiń qalada júrip-turýǵa ruqsatyńyzdyń bar-joǵyn bilý úshin JSN-di engizý kerek. Al kásiporyndar úshin BSN-di engizse jetkilikti.