Aqmola oblysynyń aǵa meıirbıkesi: Ústemaqy medısına qyzmetkerlerin jigerlendiredi

Ústemaqy medısına qyzmetkerlerin jigerlendiredi. Bul týraly Aqmola oblystyq kópbeıindi aýrýhanasy janyndaǵy provızorlyq stansıonardyń aǵa meıirbıke Lázzat Bilálova aıtty.

Onyń aıtýynsha, osyndaı jaýapty sátte aty jaman indetpen kúresip jatqan dárigerlerdiń eńbeginiń elengeni medısına salasynyń barsha qyzmetkerleriniń kóńilinen shyǵyp otyr.

– Memleket basshysy óziniń úndeýinde jahandy jaılaǵan koronavırýs ınfeksııasymen kúresýde dárigerler men medısına qyzmetkerlerine úlken senim artyp otyrǵandyǵyn aıtqan edi. Osy rette, Prezıdenttiń tapsyrmasymen koronvırýs ınfeksııasyna qarsy kúrestiń aldyńǵy leginde júrgen medısına salasynyń qyzmetkerlerine ústemeaqynyń tólenýi olardyń jaýapkershiligin arttyp, odan saıyn jigerlendire túsedi, – deıdi Lázzat Bilálova.

Joǵary sanatty, 25 jyldyq tájirıbesi bar Lázzat Bilálova qazirgi kezde, Aqmola oblystyq kópbeıindi aýrýhanasy janyndaǵy provızorlyq stansıonarda aǵa meıirbıke bolyp qyzmet isteýde. Atalmysh provızorlyq stansıonarda barlyǵy 36 adam karantınde jatyr. Olarǵa dáriger, meıirbıke, sanıtary bar 30-dan astam medısınalyq qyzmetker qyzmet kórsetýde. Onyń úıine barmaı, osyndaı jumys istep jatqanyna úsh aptadaı bolypty.

– Árıne, otbasymdy saǵyndym. Bir qalada tursaq ta jaqyndarymmen telefon arqyly beınebaılanys arqyly sóılesemiz. Eń bastysy saǵynysh emes, dertti jeńip, adamdardyń tezirek saýyǵyp ketýi. Bizderge memleket, basshylyq tarapynan barlyq jaǵdaı jasalyp otyr. Oblystyq aýrýhananyń janyndaǵy jataqhanada turyp jatyrmyz. Medısınalyq qural-jabdyqtarmen qamtamasyz etti. Osydan birer kún buryn 400 myń teńge shamasynda ústemeaqy aldyq. Sondyqtan esh alańsyz qyzmetimizdi atqarýdamyz, – dedi Lázzat Bilálova.

Aıta keteıik, osyǵan deıin habarlaǵanymyzdaı, Aqmola oblysynda 500-den astam dáriger ústemeaqy alǵan bolatyn.