Qazaqstan ishki ister mınıstrliginiń bir qyzmetkerinen koronavırýs tabyldy. Bul týraly búgin, 9 sáýirde Ishki ister mınıstriniń orynbasary Iýrıı Ilın aıtty. 

Onyń aıtýynsha, vırýs juqtyrǵan polıseı qazir emdelip jatyr, jaǵdaıy turaqty. Biraq indet tabylǵan ishki ister mınıstrliginiń qyzmetkeri qaı óńirden ekeni aıtylmady. 

Ilınniń sózinshe, indet tabylǵan qyzmetkermen qarym-qatynysta bolǵan 530 adam anyqtalǵan. Olardyń 30-ǵa jýyǵy stasıonarlyq karantınde emdelip jatyr.

"80-ge tarta adam úı jaǵdaıyndaǵy karantınde. Búginde kóbisi jumysqa shyǵyp, qyzmetin jalǵastyrýda. Ishki ister mınıstrligi qyzmetkerleriniń ómirine indet saldarynan qaýip tónip turǵan joq" dedi Ilın.

Buǵan deıin Densaýlyq saqtaý mınıstrligi elde 120 medısına qyzmetkerinen vırýs tabylǵanyn habarlaǵan. Olardyń 67-i indet juqtyrǵan adamdarmen jumys isteý barysynda ózderine juqtyrǵan. 

Qazaqstanǵa koronavırýs jetip, elde tótenshe jaǵdaı jarııalanǵan soń prezıdent Qasym-Jomart Toqaev koronavırýspen kúresip jatqan qyzmetkerlerge ústeme aqy beriletin aıtqan. Olardyń arasynda medısına qyzmetkerleri men polıseıler de bar. 

Sońǵy derek boıynsha, elde 759 adamnan vırýs tabyldy. Olardyń jeteýi kóz jumyp, 55-i jazylyp shyqty.



Ilmek sózder: koronavırýs

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir