Muqtaj azamattar «Birgemiz» qorynan 50 myń teńgeden ala bastady

«Sizdiń esebińizge 50 000 teńge tústi. #BizBirgemiz #MyVmeste #Elbasy #Nur Otan». Osyndaı habarlamalardy turǵyndardyń áleýmettik jaǵynan álsiz toptaryna jatatyn qazaqstandyq otbasylar alyp jatyr.

Nursultan Nazarbaevtyń bastamasymen qurylǵan «Birgemiz» Qoǵamdyq qory Qamqorshylyq keńesiniń ótken aptadaǵy otyrysynda koronavırýspen kúres jaǵdaıynda halyqtyń áleýmettik álsiz sanatyna kiretin muqtaj jandarǵa 50 myń teńgeden bólý týraly sheshim qabyldanǵan edi.

Bastapqyda qor qarajatyn 100 myń muqtaj azamatqa taratý josparlanǵan. Áıtse de, óńirlerden túsken ótinishter sany aıtarlyqtaı ósip, al partııanyń onlaın resýrstaryna kómek surap habarlasýshylar sany eki esege artty. Sondyqtan, Elbasynyń tapsyrmasy boıynsha Memleket basshysynyń bastamasymen qolǵa alynǵan «Biz Birgemiz» aksııasynyń aıasynda, birinshi kezeńde qarjylyq qoldaýdy 150 myńnan asa muqtaj azamatqa kórsetý týraly sheshim qabyldandy.

«Birgemiz» Qoǵamdyq qorynyń tóraǵasy Rýslan Sakeevtyń málimetinshe, qazirgi tańda 50 myń teńge materıaldyq kómekti 50 myńnan asa adam alyp úlgerdi.

– 7,6 mıllıard teńge qarajat aımaqtyq qorlardyń esebine tústi. Aqsha sol jaqtan kómek alýshylardyń banktik esep-shottaryna aýdarylady. Bular negizinen karantın qıyndyqtaryn kóbirek shegip jatqan 23 iri qalanyń turǵyndary. Ákimder men áleýmettik qorǵaý organdary usynǵan kómek alýshylar tizimderinde tabys deńgeıi eń tómen áleýmettik álsiz toptardan quralǵan azamattar qamtylǵan. Onyń ishinde az qamtylǵan jáne kópbalaly otbasylar, muqtaj múgedek jandar, múmkindigi shekteýli bala tárbıelep otyrǵan otbasylar, eń tómengi zeınetaqy alatyn jáne áleýmettik jaǵynan álsiz topqa kiretin zeınetkerler, jetim balalar, UOS-nyń ardagerleri men olarǵa teńestirilgen tyl eńbekkerleri bar, – dedi Rýslan Sákeev.

Sonymen qatar, ol materıaldyq kómekti ekinshi deńgeıdegi bankter arqyly jeke tulǵalardyń kartochkalaryna nemese aǵymdaǵy esepshottaryna aýdarý kezinde odan komıssııa alynbaıtynyn aıtty. Sondaı-aq, bul qarajattyń kredıtteri boıynsha qaryzy bar azamattardyń bereshegin óteý úshin ustalyp qalmaýy da pysyqtalǵan.

– Búgin erekshe qajettiligi bar balalardy tárbıelep otyrǵan otbasylar "BIZBIRGEMIZ" QQ-nan 50 000 teńge kómek ala bastady. Bul Elbasy men Nur Otan partııasynyń arqasynda júzege asyp otyr. Áleýmettik saıasatty durys baǵytta júrgizip, ardagerlerdi, erekshe qajettiligi bar balalardy jáne turǵyndardyń áleýmettik álsiz toptaryn eshqashan qamqorlyqsyz qaldyrmaıtyndaryńyz úshin alǵysymyzdy bildiremiz. Osyndaı qıyn ýaqytta árbiriniń esebine 50.000 teńgeden aýdaryp, múgedek balalardy da nazardan tys qaldarmadyńyzdar, – dep jazdy óziniń Facebook-tegi paraqshasynda «Orda» elordalyq aýtızimi bar balalardyń ata-analar birlestiginiń jetekshisi Saltanat Esmagambetova.

– Búgin meniń kartochkama #Birgemiz qorynan 50 myń teńge túskeni týraly habarlamany alyp qýanyp qaldym. Elbasyǵa jáne Nur Otan partııasyna qazirgideı qıyn kezeńde bizdi elep-eskergeni úshin raqmet aıtamyn. Estýim boıynsha, mundaı kómekti az qamtylǵan kópbalaly otbasylar, 1 top múgedekteri, jetim balalar alady. Qala turǵyndarynan karantın ýaqytynda barlyq qaýipsizdik sharalaryn qatań saqtap, asa qajet bolmaǵan jaǵdaıda úıden shyqpaýlaryn ótinemin. Biz birge barlyq synaqqa tótep bere alamyz. #BizBirgemiz!, – dep jazdy óziniń Instagram paraqshasynda Almaty qalasynyń turǵyny, úsh balanyń anasy Ásel Omarova.

Jalpy «Birgemiz» qoǵamdyq qorynyń esepshotyna 14 mlrd. teńgege jýyq qarjy tústi. Jýyq arada 50 myń teńge kólemindegi birjolǵy tólemdi indet juqtyrǵandardyń 70%-ke jýyǵy shoǵyrlanǵan Nur-Sultan jáne Almaty qalalarynyń 2 myńnan astam dárigerleri de alady. «SQ-Farmasııa» úkimettik operatorymen Nur-Sultan, Almaty jáne Shymkent qalalary turǵyndarynyń álsiz toptaryna tegin taratý úshin 5 mıllıon maska satyp alý týraly shartqa qol qoıyldy. Jınalǵan qarajat jáne óńirler boıynsha bólingen kómek týraly aqparatty baqylap otyrý úshin qor birgemiz2020.kz resmı saıtyn ashty.