"Kedeı memlekettiń kedeı muǵalimimin". Internetke kire almaǵan ustazdyń janaıqaıy (vıdeo)

Áleýmettik jelide ózin Almaty oblysy Kóksý aýdany Muqyry aýyly Qalqa Japsarbaev atyndaǵy orta mekteptiń qazaq tili pániniń muǵalimi Maıra Baıbolatova dep tanystyrǵan kelinshektiń beıneúndeýi taralýda. Muǵalim úndeýin bilim jáne ǵylym mınıstri Ashat Aımaǵambetovke arnaǵan.

Vıdeo keshki ýaqytta, qas qaraıǵan shaqta túsirilgen. Muǵalim óziniń úıinde ınternet ustamaıtyndyqtan, turmystaǵy sińlisiniń úıine Kundelik.kz-ke kirý úshin noýtbýgyn arqalap, tún jarymda bara jatqanyn aıtady.

– Sińlim kóp balaly ana, joldasy, bala-shaǵasy bar. Bireýdiń úıine arqalanyp baryp, olardyń berekesin alǵanym durys emes ekenin bilemin. Biraq amal neshik, úıimde, aýylymda ınternet joq bolǵan soń osylaı júrýime týra keledi. Qashyqtan oqýtý bastalǵany ekinshi kún qatarynan osylaı júrmin. Bireýdiń úıine baryp jumys isteý qıyn. Bilim jáne ǵylym mınıstri Ashat Aımaǵambetov, aýylymyz tynysh, dese de tún ishinde eki kósheniń arasynda sabylyp júrgen maǵan qıyn. Karantın kezinde osylaı júrýge bola ma?!, – deıdi muǵalim. 

"Urpaqty qalaı oqytamyn, qalaı el qatarly jumys istep, qalaı kredıtimdi jabamyn degen men sııaqty jas ustazǵa osylaı júrý óte aýyr" degen ol bul jaǵdaı Qazaqstandaǵy kóptegen ustazdyń basyndaǵy qıyndyq ekenin aıtty.

– Men basynda úıi joq, kvartırada turatyn, sol kvartırasynda ınterneti joq kedeı memlekettiń kedeı muǵalimimin. Sol úshin ókpelimin. Jaǵdaıyń bolmasa seniń bilimiń eshkimge qajet emes. Mundaı muǵalim aldyndaǵy balany qalaı tárbıeleıdi. Qalaı ol urpaqqa ulttyq rýh, patrıottyq sezimdi uǵyndyrady" degen ustaz kóz jasyna erik berdi.