"Jambyl oblysynda dárigerlerdiń koronavırýs juqtyrǵanyn jasyryp otyr"

Jambyl oblysy Merki aýdandyq ortalyq aýrýhanasynyń Tolqynaı Ordabaeva atty ınfeksıonıst dárigeri qyzmet barysynda  koronavırýs juqtyrǵanyn, qazir Tarazdaǵy ınfeksııalyq stasıonarda jatqanyn jazdy. Dáriger "aýdandyq aýrýhana basshylyǵy medısınalyq qorǵanys quraldarymen qamtamasyz etpedi" dep otyr.

Onyń aıtýynsha, medısınalyq mekeme ákimshiligi dárigerlerge qysym kórsetip, olardy medısınalyq maska tigýge májbúrlegen. Jumysta maska men qarapaıym qorǵanys quraldaryn bermesten, shamadan tys eńbekke jekken. Sonyń saldarynan dárigerdiń ımmýnıteti álsirep, koronavırýs juqtyryp alǵan.

– Naýqastarmen baılanysta bolǵan adamdar karantınniń 14-kúninde qaıta testileýden ótkizilmedi. О́ıtkeni Jambyl oblysynda oǵan qolaıly orta men qarajat joq. Sondyqtan naýqastarmen baılanysta bolǵandar koronavırýs boıynsha sońǵy analız alynbastan aýrýhanadan shyǵaryldy. Qazir vırýsqa qarsy "Alývııa" dárilik preparatyn qabyldap jatyrmyn. Alaıda bul dáriniń keri áseri kóp. Meni  koronavırýsqa shaldyqqan epıdemıolog dárigerdiń janyna ornalastyrdy, – dedi dáriger. 

Sondaı-aq ol Jambyl oblysynda koronavırýsty anyqtaý úshin naýqastardan tizbekti polımerazdy reaksııa alynbaıtynyn, ondaı TPR testteriniń joq ekenin, baılanysta bolǵandardy qaıta testileý jasalynbaıtynyn aıtty.

– Jambyl oblysynyń densaýlyq saqtaý basqarmasy dárigerlerdiń koronavırýs juqtyrǵanyn jasyryp otyr. Meni nege jeke palataǵa jatqyzbaıtyny, menen jáne meniń qasymdaǵy naýqastan aýrýhanaǵa túskende nelikten qaıtadan analız alynbaǵany túsiniksiz. Jambyl oblysynyń densaýlyq saqtaý basqarmasyna dári-dármek pen qorǵanys materıaldaryna, dárigerlerdi sanaty boıynsha yntalandyrýǵa dep bólingen qarjy qaıda ketti sonda? Nege oblysta koronavırýsqa TPR zertteý júrgizilmeıdi, nege test alynbaıdy? Jambyl oblysyndaǵy medısına qyzmetkerleriniń koronavırýs juqtyrǵany nege jasyrylyp otyr? Meniń jumys kezinde koronavırýs juqtyrýyma baılanysty nege epıdemıologııalyq tergeý jasalmaıdy?, – degen saýaldaryn qoıdy Tolqynaı Ordabaeva.