Nursultan Nazarbaev: Bizdiń elde budan da qıyn kúnder ótken (vıdeo)

Qazaqstannyń eks-prezıdenti Nursultan Nazarbaev Úkimet basshysy Asqar Mamınmen kezdesti, dep habarlaıdy Qamshy.kz aqparat agenttigi.  elbasy.kz saıtynyń deregin negizge alyp. 

Kezdesý barysynda Qazaqstannyń Tuńǵysh Prezıdenti elimizde qabyldanǵan sharalardyń arqasynda koronavırýs ınfeksııasynyń taralý qarqyny tómendegenin aıtyp ótti.

«Medısına qyzmetkerleriniń kelisilgen jumysyn erekshe atap ótkim keledi. Qıyn jaǵdaıda quqyq qorǵaý organdary da óz jumysynyń tıimdiligin kórsetýde. Úkimet pen jergilikti atqarýshy organdar da belsendi jumys istep jatyr», dedi Nursultan Nazarbaev.

Elbasy Memleket basshysynyń tapsyrmalaryn sapaly oryndaýdyń mańyzdylyǵyn atap ótti.

«Prezıdenttiń barlyq bastamasyn jergilikti halyqqa jetkizýdiń mańyzy zor. Men bul týraly oblys ákimderimen telefon arqyly sóılesken kezde de aıttym», - dedi Nursultan Nazarbaev. 

Sonymen birge Nursultan Nazarbaev osy jaǵdaıda ekonomıkalyq qaýipsizdikti qamtamasyz etý qajettiligine nazar aýdardy.

«Álemdegi ekonomıkalyq ahýal kúrdeli. Biraq birinshi toqsannyń qorytyndysy boıynsha bizdiń eldiń kórsetkishteri jaman emes. Alaıda karantınniń áseri áli kúnge deıin eldiń ekonomıkalyq kórsetkishterine tolyq áser etpegenin eskergen abzal. Shaǵyn jáne orta bıznesti qoldaý jáne halyqty azyq-túlikpen qamtamasyz etý máseleleri mańyzdy bolyp qala beredi. Endi daǵdarystan keıingi kezeńde ne isteıtinimizdi oılastyrýymyz kerek. Ekonomıka quldyraıdy. Onyń saldary 2008 jylǵy daǵdarystan keıingi kezeńge qaraǵanda anaǵurlym aýyr bolatyn sekildi»,  dedi eks-prezıdent.

Nursultan Nazarbaev Ulttyq qor men Úkimettiń rezervinen otandyq ekonomıkany qoldaý úshin 10 mıllıard dollardyń ýaqtyly bólingenin jetkizdi.

О́z kezeginde premer-Mınıstr Qazaqstannyń eks-prezıdentine koronavırýs ınfeksııasynyń taralýyn boldyrmaý jáne áleýmettik-ekonomıkalyq turaqtylyqty qamtamasyz etý boıynsha qabyldanǵan sharalar týraly aqparat berdi.

Kezdesý sońynda Nursultan Nazarbaev ekonomıkanyń shıkizattyq emes sektorlaryn damytýǵa baǵyttalǵan baǵdarlamalardy iske asyrýdyń ózektiligine toqtaldy.

«Bizdiń elde budan da qıyn kúnder ótken. Biz bul qıyndyqtardy da jeńemiz. Eń bastysy - halqymyzdyń birligi men tynyshtyǵy. Úkimet tıimdi jumys isteıdi dep sanaımyn. Erteń men Qazaqstan halqyna arnalǵan maqalamdy jarııalaımyn. Qazir búkil álemge ońaı tıip turǵan joq. Aýrýdyń shyrqaý sheginen áli ótpedik. Sondyqtan biz bir-birimizdi qurmetteı otyryp, sabyr pen shydamdy tanytýymyz kerek», - dedi Nazarbaev.