Almatyda áskerge barýǵa óz erkimen kelisken 300-ge jýyq erikti bar

Qala ákimdiginiń baspasóz ortalyǵynda Almaty qalasy qorǵanys isteri jónindegi departamentiniń basshysy Amantaı О́serbaevtyń qatysýymen áskerı mindettilerdi arnaıy jıyndarǵa shaqyrý máselelerin túsindirý boıynsha onlaın brıfıng ótti.

– Almatyda áskerge barýǵa óz erkimen kelisken 300-ge jýyq erikti tótenshe jaǵdaıǵa kómektesýge daıyn ekendikterin bildirdi. Sonyń ishinen ásker qataryna 200-deı azamat iriktelip alynady. Áskerı boryshyn óteý merzimi bir aı. Ázirge osy jumystar boıynsha Almaty qalasy ákiminiń arnaıy úkimin kútip otyrmyz. Osy úkimge baılanysty ásker qataryna shaqyrylatyndardyń naqty sany men merzimi belgili bolady, – dedi A. О́serbaev.

Almatyda áskerı esepte turǵan jáne densaýlyq jaǵdaıy boıynsha jaramdy dep tanylǵan azamattardy arnaıy jıyndarǵa shaqyrý shamamen 1 aıǵa sozylady. Sondaı-aq azamattar áskerge turǵylyqty meken-jaıy boıynsha shaqyrylady. Olar áskerı mindetin atqarǵan soń kún saıyn úıine jiberilip otyrady eken.

Brıfıngte spıker arnaıy jıyndarǵa shaqyrylǵan azamattardyń eńbekaqysyna da toqtaldy.

– Arnaıy jıyndar kezinde áskerı qyzmetke mindetti azamattardyń jumys orny jáne atqarǵan laýazymy saqtalady. Eger adam jumys istemese, onda jalaqynyń tómengi mólsheri – 42 500 tg bolady, – dedi departament basshysy.

Sonymen qatar, A. О́serbaev qalanyń ár aýdanynda ornalasqan Qorǵanys isi jónindegi departament bólimsheleri áskerı qyzmetke kelýshilerdi jasaqtaýǵa jáne olardy medısınalyq tekserýden ótkizýge tolyq daıyn ekendigin de jetkizdi.

 

– Zań boıynsha 60 jasqa deıingi ofıserler, 50 jasqa deıingi áskerıler, serjanttar áskerı boryshyn óteýge mindetti. Al ásker qataryna áıel azamattar shaqyrylmaıdy. Tipti, ol áıel azamattyń óz erki bolsa, bul zańda qarastyrylmaǵan, – dedi spıker.

Aıta ketý kerek, áskerı qyzmetke shaqyrylǵanda densaýlyǵy nashar, otbasy jaǵdaıy aýyr, balalary bar jáne taǵy basqa faktorlardy áskerı komıssarıat eskeretin bolady.