Soltústik Amerıkanyń baıyrǵy turǵyndary koronavırýstan aman qalý úshin taýǵa ketpek

Kanadanyń baıyrǵy turǵyndar qalalardy tastap, jabaıy tabıǵatqa ketpek. Olardyń aıtýynsha, baıyrǵy turǵyndar qarttardyń ómirlik tájirıbelerine súıenip, osylaı jasaýdy sheshken, dep jazady aljazeera.com.

Pol Petrın esimdi baıyrǵy turǵyn Kanadanyń soltústiginde jabaıy tabıǵatta ómir súrýge daǵdylanǵan. Jıyrma jyldan astam ýaqyt boıy soltústik-batys aımaqtaǵy Makkenzı ózeniniń jaǵasynda ómir súrgen. Bul shalǵaı aımaqqa kún jyly aılarda qaıyqpen nemese arktıkalyq qys aılarynda tek shanamen ǵana jetýge bolady.

Sońǵy jyldardan beri Inývık qalasynda ómir súredi. Endi olar Inývıktegi úıinen ketip, jabaıy tabıǵatqa oralýǵa daıyn. Bul joly ol koronavırýs sebebinen ketpek.

– Barlyǵy jabaıy tabıǵatqa qaıtýǵa daıyndalyp jatyr, – dedi ol telefon arqyly Ál Jazıra telearnasyna.

Inývık qalasynda kóbinese ınývıalýıt (batys kanadalyq ınýıt) halqy turady. Onda bar-joǵy 3000-nan astam baıyrǵy turǵyn bar. Qazirge deıin Inývıkte koronavırýs aýrýy tirkelgen joq, qala jergilikti dúkenderde áleýmettik oqshaýlaný erejelerin saqtaý arqyly saqtyq sharalaryn júrgizýde. Soltústik-batys aımaq provınsııasynyń úkimeti 20 naýryzda pandemııaǵa baılanysty aýmaqtaǵy barlyq mańyzdy emes saparlarǵa tyıym salǵan.

– Biz onda ózimiz qalaǵan nárseni isteı alamyz. Balalar jabaıy tabıǵatta oınaıdy. Biz ań aýlaımyz, balyq aýlaımyz. Jer bizge janýarlarǵa, ósimdikterge jáne bárine arnalǵan. Ol jaqtyń sýy da keremet, kóktemde tup-tunyq, – deıdi Petrın.

Onyń áıeli Emı jáne 11 jastaǵy qyzy Zoı, ekeýi de jer men resýrstardy paıdalanýdy úırengen. Petrınniń túsindirýinshe, Zoı bala kezinen-aq bárin úırengen, jabaıy tabıǵatta qalaı ómir súrýge bolatynyn jaqsy biledi.

– Zoı qaz pisire alady. Ol mýskrat soıyp, terisin sypyra alady. Ot jaǵyp, ystap qurǵaq et jasaıdy. Biz jıdek terip, balyq aýlaýǵa baramyz, – dep qosty ol.

Olardyń shatyrlary yńǵaıly, shamamen 15 adamdy syıǵyza alatyndaı úlken. Petrınder ózderimen birge birneshe otbasy men dostaryn alyp, COVID-19 qaýip-qaterinen alys ketpek. Olardyń aıtýynsha, júzdegen turǵyn kóshýge daıyndalyp jatyr. Kózdegen jerge qaıyqpen bireshe kún boıy júzip barady.

Olardyń aıtýynsha, myńdaǵan shaqyrym alystaǵy ózge baıyrǵy turǵyndar da solaı istemekke daıyndalyp jatqan kórinedi.