05 Sáýir, 2020 NEWS

"Nur-Sultan, Almaty jáne Shymkent qalalarynda juqpaly aýrýlar aýrýhanasyn  salý qajet"

facebook

Qazaqstannyń densaýlyq saqtaý mınıstrligi Nur-Sultan, Almaty jáne Shymkent syndy úlken qalalarda keminde 3 tez turǵyzylatyn juqpaly aýrýlar aýrýhanasyn  salý qajet degen usynys jasady. Bul týraly Eljan Birtanov Facebook paraqshasynda jazdy. 

– Aýrýhanalardyń ınfeksııalyq qaýipsizdik talaptaryna saı bolýy óte mańyzdy: bokstalǵan palatalar, jeldetý júıesi, onyń ishinde reanımasııalyq palatalarda qysym bolmaýy tıis, aımaqtardy "taza" jáne "las" dep bólý qajet. Biz Qytaıdyń tez salynatyn aýrýhanalardy qalaı paıdalanǵanyn kórdik. Al AQSh, Italııa jáne basqa eýropalyq elderde kúndelikti qoldanystaǵy aýrýhanalarǵa úlken aýyrpalyq túsgenin de bilemiz. Kóptegen memleket pasıentter men medısına qyzmetkerleriniń densaýlyǵy úshin ınfeksııalyq qaýipsizdik tehnologııasy joq obektilerdi, sport ǵımarattaryn paıdalanýǵa májbúr boldy, – dedi Birtanov.

Densaýlyq saqtaý mınıstrligi Nur-Sultan, Almaty jáne Shymkent syndy úlken qalalarda keminde úsh tez turǵyzylatyn juqpaly aýrýlar aýrýhanasyn (birinshi kezeńde 200-300 oryndyq) salý qajet degen usynys jasaǵanyn atap ótti. 

– Bizge otandyq qurylys kompanııalary qoldaý kórsetti. Qysqa merzimde (15-20 kún ishinde) qurylysty aıaqtaý josparlanýda. Jedel tehnologııalar, daıyn bloktyq-modýldik sheshimder, zamanaýı ınfeksııalyq qaýipsizdik júıeleri paıdalanylady, medısınalyq jáne zerthanalyq jabdyqtar ornatylady, – dedi mınıstr áleýmettik jelidegi paraqshasynda.

Mınıstrdiń aıtýynsha elimizge bul sharalar koronavırýs pandemııasyn ǵana emes, sondaı-aq bolashaqta ózge de indetterge qarsy turyp, ony der kezinde joıýǵa múmkindik beretinin atap ótti.

– Koronavırýs pandemııasyna qarsy qabyldanǵan sharalarǵa túsinistikpen qarap, bizdi qoldaǵan halqymyzǵa alǵys bildiremin. Sonymen qatar, tek resmı aqparatqa kóńil bólip, jaýapty mamandardyń pikirine ǵana qulaq asýlaryńyzdy suraımyn. Tótenshe jáne shuǵyl sharalardyń barlyǵy el azamattarynyń densaýlyǵy úshin qabyldandy! Biz jeńemiz! Biz birgemiz! , – dep Eljan Birtanov sózin tóıindedi.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir