• USD 414.13
  • EUR 451.4
  • RUB 5.8
  • CNY 58.03

04 Sáýir, 2020 Áleýmet

Karantın engizilgeli 1406 biryńǵaı baılanys ortalyǵyna 119 myńnan astam qońyraý túsken

Qamshy.kz

Karantın engizilgeli Medısınalyq saqtandyrý qorynyń 1406 biryńǵaı baılanys ortalyǵy 119 myńnan astam qońyraý qabyldady. Saýaldardyń basym bóligi – karantın men koronavırýs ınfeksııasyna qatysty. Bul týraly «Áleýmettik medısınalyq saqtandyrý qory» KEAQ Almaty qalalyq fılıalynyń dırektory Nurlybek Qabdyqaparov brıfıng barysynda aıtty.

Onyń aıtýynsha, 2019 jyldyń 1 qyrkúıeginen beri jumys istep kele jatqan baılanys ortalyǵy qyzmetkerleri kún saıyn 5 myńnan astam qońyraý qabyldaıdy. Qazaqstandyqtardy tabysynan aıyrylǵandarǵa, jumyssyz qalǵandarǵa beriletin áleýmettik tólemder, karantın engizilgen qalalar men oblystar aýmaǵynda júrip-turý, koronavırýs ınfeksııasyna test tapsyrý, jalǵyzilikti kisilerge, qarttar men múgedekterge azyq-túlik pen dári-dármek jetkizý joldary syndy taǵy da basqa máseleler jıi mazalaıdy.

– Karantın engizilgeli beri shuǵyl jelige túsetin júkteme de artty. Azamattar ózderin mazalaǵan suraqtardyń jaýabyn bizdiń ortalyq mamandarynan surap bilgisi keledi. Sondyqtan qazirgi tańda Qor úshin medısınalyq qyzmet sapasyn baqylap qana qoımaı, halyqqa durys aqparat berý máselesiniń de mańyzy zor, –  dep atap ótti N.Qabdyqaparov.

Sonymen qatar, fılıal basshysy saqtandyrý júıesindegi jeńildik merzimin 1-sáýirden 1-shildege deıin uzartý máselesine de toqtaldy. Jańa tártip boıynsha, saqtandyrylmaǵan azamattar aldaǵy úsh aıda mindetti áleýmettik medısınalyq saqtandyrý paketindegi qyzmetterdi de tolyqqandy paıdalana alady.

Áýelde jyldyń bastapqy úsh aıy ótpeli kezeń retinde jarııalanǵan bolatyn. Bul jańa júıege qatysty týyndaǵan máselelerdi sheship, turǵyndarǵa jańa júıeniń artyqshylyqtaryn sezinýge múmkindik berdi.

– Qazir Almaty turǵyndarynyń 93 paıyzy saqtandyrylǵan. Onyń jartysynan astamy úshin jarnany memleket tóleıdi. Biraq ózin-ózi jumyspen qamtyǵan, beıresmı jumys isteıtin azamattarǵa da jaǵdaı jasaý kerek. Sondyqtan olardyń bárine qazirgideı qıyn ýaqytta saqtandyrý paketindegi qyzmetterdi kedergisiz paıdalanýǵa múmkindik berilip otyr, –  dedi fılıal basshysy.

Osy maqsattarǵa arnap qor ishki rezervinen 20 mlrd teńge bólýdi josparlap otyr. Bul qarjy qazaqstandyqtardyń KT, MRT syndy baǵasy qymbat analızder men operasııalarǵa degen suranysyn qanaǵattandyrýǵa jumsalmaq.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir