• USD 413.12
  • EUR 452.86
  • RUB 5.82
  • CNY 57.92

03 Sáýir, 2020 NEWS

Koronavırýs kúdigimen karantınde jatqan naýqas jaǵdaıyn baıandady

qamshy.kz

Qazaqstanda áýe baılanysy toqtamaı turǵanda shetelden ushyp kelgen azamattar 14 kúnge karantınge jatqyzylatyn. Alaıda elge oralǵandardyń bári birdeı karantınge jabylmaǵan. Bul týraly Qamshy tilshisine karantınge jatqyzylmaǵan jaqyndarynan koronavırýs anyqtalyp, olarmen baılanysta bolǵany úshin Almaty oblysy Shamalǵan eldimekenindegi juqpaly aýrýlarǵa arnalǵan emhanada jatqan Áıgerim Senbıeqyzy aıtyp berdi.

Naýqastyń inisi men kelini 25 naýryz kúni Nıý-Iorkten Máskeý arqyly Almatyǵa ushyp kelgen. Olar otyrǵan ushaqta eki adamnan koronavırýs anyqtalyp, ushaq áýejaıǵa qonysymen, jolaýshylardy Jangeldın kóshesi boıyndaǵy aýrýhanaǵa jetkizgen.

– Inim men kelinimnen analız alyp, test jasap, olardy 24 saǵat aýrýhanada ustady. Test nátıjeleri teris shyǵyp, eshqandaı syrqat belgileri baıqalmaǵan soń olarǵa «úıden shyqpańdar» dep eskertip, 26 naýryzda úı karantınine jiberdi. Shetelden kelgenderdi aýrýhanaǵa 14 kúnge jatqyzady deýshi edi ǵoı. Olardy óıtpedi. Inimder úılerine jedel járdem kóligimen emes, kádimgi taksımen keldi. Jaqyn mańda bolǵandyqtan maǵan azyq-túlik alyp kelýimdi ótindi. Men kerek-jaraqtaryn aparyp, kópten kórmegen jaqyndarymmen áńgimelesip birneshe saǵat otyryp qaldym. Medısınalyq tekserýden ótkendikten týystarymda vırýs anyqtalady degen oı basyma kirip shyqqan emes, – deıdi Áıgerim Senbıeqyzy.

Onyń sózinshe, kóp uzamaı kelininiń tamaǵy aýyryp, jótel paıda bolǵan. 27 naýryz kúni shaqyrylǵan jedel járdem kóligi olardy Qaskeleńdegi juqpaly aýrýlarǵa arnalǵan emhanaǵa alyp ketken. Ol jaqta tapsyrylǵan testter naýqastyń kelininde oń, inisinde teris nátıje kórsetken.

– Ekeýi eki túrli nátıje kórsetkendikten, bólek bólmelerge oqshaýlandy. Kelesi kúni olarmen tikeleı baılanysta bolǵandyqtan meni de jedel-járdem alyp ketip, Shamalǵanǵa karantınge japty. Inim men kelinimmen únemi sóılesip turdym. Kelesi kúnderdiń birinde kelinimniń janyna jańadan kelip túsken naýqasty ornalastyrypty. Kelinimiz júkti edi. О́ziniń jáne qursaǵyndaǵy balanyń densaýlyǵy úshin ony basqa bólmege aýystyrýdy talap ettik. Sodan keıin baryp qana ertesine dárigerler jańa kelip túsken naýqasty basqa palataǵa ornalastyrdy, – dedi kelinshek.

Karantınde jatqan Aıgerim Senbıeqyzy óziniń jaǵdaıy qanaǵattanarlyq ekenin, dárigerler dene qyzýyn jıi-jıi tekserip jatqanyn aıtty. Karantınge jatqyzylǵaly odan eki ret koronavırýsqa test alynǵan. Odan indettiń belgileri anyqtalmaǵan.

– Men 28 naýryzda karantınge jatqyzyldym. Sol kúni test aldy. 29-y naýryzda ekinshi ret test aldy. Negizi test bir ret alynyp, 14 kúnge deıin jaqsy bolsań, test ekinshi ret alynbaıdy eken degendi estigenmin. Al menen eki ret alyndy. Dárigerler munyń sebebin ashyp-jaryp aıtpady. Sondyqtan densaýlyq saqtaý mınıstrligine shyqtym. Mınıstrlik ókili maǵan qatysty eki ret test alynǵany týraly derek joqtyǵyn málim etti. Eki kún qatarynan test alyp, nátıjesin aıtpaı otyrǵandary alańdatyp otyrǵanyn nesin jasyraıyn. Dese de dárigerler jaǵdaıymdy qanaǵattanarlyq dep otyr, – dedi Aıgerim Senbıeqyzy.

Sonymen qatar ol bastapqyda inisi men kelini jatqan Qaskeleńdegi juqpaly aýrýlarǵa arnalǵan emhanada jaǵdaıdyń nashar bolǵanyn atap ótti.

– Á degende Qaskeleńdegi aýrýhananyń jaǵdaıy syn kótermeıtin. Ony inim vıdeoǵa túsirip, áleýmettik jelige salyp jiberdi. Osydan keıin emhanaǵa jóndeý júrgizilip, naýqastarǵa kóbirek kóńil bóline bastady. Artynsha, aýrýhana basshylyǵy vıdeony alyp tastaýdy jáne jaǵdaılarynyń jaqsy ekeni týraly qaıtadan vıdeo túsirip jelige júkteýdi ótindi. Aýrýhananyń bas dárigeri aǵama habarlasyp, jiberilgen qatelikter úshin keshirim surady. Qazirgi ýaqytta bárimizdiń jaǵdaıymyz jaman emes, – deıdi naýqas.

Áıgerim Senbıeqyzy karantınde jatqan, koronavırýs anyqtalǵan naýqastarǵa qajetti em jasalyp, dári berilip jatqanyn atap ótti.

– Kúndelikti temperatýramyzdy 3-4 ret ólshep, qan qysymymyzdy tekserip, ımmýnıtetti kóteretin dári-dármek jáne dárýmender beredi, – degen ol o bastaǵy keleńsizdikterge qaramastan, aýrýhana ujymy men dárigerlerge rızashylyǵyn bildirdi.

Onyń sózinshe, aýrýhanada jóndeý áli kúnge deıin júrip jatyr.

 

 

 

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir