• USD 468.56

  • EUR 497.56

  • RUB 7.3

  • CNY 67.18

29 Naýryz, 14:34:00
Almaty
+35°

Jalpy, qasiret, jamandyq ataýly jalǵyz-jarym júrmeıtini, el men jurttyń eńsesi, rýhy túsken kezeńde tópelep kep birinen keıin biri shúıdeden soǵatyny belgili. Shydas berý óte qıyn. Halqymyzdyń ósý-órkendeý shejiresin paraqtasaq, qazaq el bolyp etek jınaǵaly neqıly zobalańdardy bastan ótkerip, barlyǵynan da berekesi men birliginiń arqasynda aman-esen ótken eken.

Osy jolǵy koronovırýs náýbeti – tek qana qazaq emes, álem jurtyna synaq bolatyn sııaqty. Bul adamzatqa qyrǵyn sebetin zaýal qaıdan keldi, jer betin qashanǵa deıin úreı men qorqynysh ýysynda ustaıdy, aıaqtalar merzimi aıqyn ba, antıvırýs tabyla ma degendeı úmit-suraqtar áli kúngi ashyq tur. Jalpy, qazaqta: «Jaman aıtpaı –  jaqsy joq» degendeı ymyraǵa, jaǵympazdyqqa kónbeıtin mátel bar. Kógentúp mazmuny, shyndyqty búrkemelemeı ashyq aıt degenge saıady. Ashyǵyn aıtaıynshy.

Aqyrzaman jaıly aıtý erte. Desek te, adamzattyń ásire azǵyndap, ásire esirip, ásire esiriktenip bara jatqany ras bolatyn. Qazaqta: «Jalshyǵa jymıyp qarasań, shapanyna jamaý suraıdy» degendeı turaqty sóz tirkesi bar. Biz Allanyń keńpeıildiligin kótere almadyq. Adamı moral shekarasyn buzyp-jaryp, topalań jasap jatqanymyzdy birde jańa zaman mádenıetiniń sharyqtap ósýine, endi birde órkenıetke jatqyzyp, solardy jer betin jaılaǵan pendelerdiń barlyǵyna úlgi-etalon retinde usyna bastaǵanymyz ótirik pe?! Táýbemizge túspedik, Jasaǵannyń qolynan alyp otyrǵan tańǵy asymyzǵa shúkirimizdi aıtýdy umyttyq, nıetimiz ben peıilimiz taryldy, mondanaqtaı Jer betin jemqorlyq pen boq-dúnıege degen ashqaraqtyq jaılady, meıirim men ımandylyqty ysyryp tastap qorqaýlyqty, qaraqshylyqty aldyńǵy qatarǵa shyǵardyq. Urpaǵymyzǵa úlgi ettik.

Mine, adam balasynyń dáp osyndaı azǵyndaýyn Alla kórmeı, bilmeı otyr deısiz be? Joq. Kórip otyr. Kóz jasyn kóldetip otyr. Aqyry, qatal sheshimge keldi ol. Myna zaýal – Jasaǵan ıemizdiń  adamzatty bir sátke bolsyn táýbesine túsireıin degendeı oqys áreketi. Allanyń eskertýi: «Joǵaltqan jaqsylyqtaryńdy qaıtara taýyp al, kózińdi ash! Eı, pende, Adam ekenińdi umytpa!»

Másele, bul indettiń qaıdan, kimnen shyqqanynda emes. Másele: birlik pen berekede! Mádenıet pen órkenıet esirik bı men tán jalańashtaýda, daraqy án men beıádep tirlikte deý óte jańsaq uǵym. Kemeńgerimiz Abaıdyń muqym shyǵarmalarynyń túıini nege Adam bol degen túsinikke toqaılasady deısiz. Adam bolý – kisilik pen adamgershilik, uıat pen ar sheńberin buzbaý! Buzdyń ekensiń – seniń adamdyǵyńnyń quny bes tıyn!

Qazirgi kúngi koronovırýs zaýalyn tek adamı salqynqandylyq, memlekettik birlik, ulttyq bereke, álemdik aýyzbirshilik arqyly ǵana jeńemiz.

Álibek Qańtarbaev,

Qazaqstan jazýshylar odaǵy Shyǵys Qazaqstan oblystyq fılıalynyń

dırektory

"Qamshy" silteıdi
Ilmek sózder: koronavırýs

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir