"О́zbekstanǵa toıǵa barǵan": Almaty oblysynda taǵy eki adamnan koronavırýs anyqtaldy

Almaty oblysynda koronavırýs dıagnozymen taǵy 2 adam tirkeldi, dep habarlaıdy Qamshy.kz aqparat agenttigi

Belgili bolǵandaı, olar Almaty irgesindegi Qarasaı jáne Eńbekshiqazaq aýdandarynda anyqtalyp, jalpy oblysta vırýs juqtyrǵandar sany 6-ǵa jetken.

Qaterli indet juqtyrǵan naýqastyń bireýi - Qarasaı aýdany, Kemertoǵan aýylynda turatyn 41 jastaǵy áıel adam. Naýqas qazir Qarasaı aýdandyq ınfeksııalyq aýrýhanasyna jatqyzyldy.

Oǵan qosa onymen qarym-qatynasta bolǵan 6 adam, sonyń ishinde, azamatshanyń kúıeýi men 2020 jyly týǵan sábıi karantınge alyndy.

Ekinshi jaǵdaı boıynsha, 1960 jyly týǵan naýqas aǵaıyn-týysymen О́zbekstanǵa úılený toıyna shaǵyn avtobýspen barǵan. 14 adamnyń О́zbekstannan Qazaqstanǵa ótip, Esik qalasyna kelgeni týraly málimetterdi Túrkistan oblysyndaǵy sanıtarlyq-epıdemıologııalyq mamandar habarlaǵan. 

Tıisinshe, jolaýshylaǵan top oblysqa kelgen bette provızorlyq stasıonarǵa jatqyzylǵan. Sonyń ishinde, 1960 jyly týǵan áıelden vırýs anyqtalyp, qazir ol Qarasaı aýdandyq ınfeksııalyq aýrýhanasyna jatqyzylyp, onymen qarym-qatynasta bolǵan ózgeleri de karantınde alynǵan.