Qostanaıda jańa avtomobıl modelderiniń birlesken óndirisi ashyldy

Telekópir aıasynda QR Premer-Mınıstri A. Mamın men О́R Premer-Mınıstri A. Arıpov «SaryarqaAvtoО́nerkásip» JShS jáne «UzAuto Motors» AQ birlesken jobasyn resmı túrde iske qosty. Jańa óndiristik jelide osy jyldyń sońyna deıin 1 myńnan astam joǵary ónimdi jumys orny qurylatyn bolady, bul qyzmet kórsetý men óndiris sektorlary arasyndaǵy jumys kúshi aǵynynyń ósýi turǵysynan erekshe mańyzǵa ıe. Qazirgi tańda zaýyt tolyq júktememen úsh aýysymda jumys isteıdi.

«Qazaqstannyń Tuńǵysh Prezıdenti – Elbasy Nursultan Ábishuly Nazarbaev pen О́zbekstan Prezıdenti Shavkat Mıromonovıch Mırzıeev ekijaqty qarym-qatynasty strategııalyq yntymaqtastyqtyń jańa deńgeıine shyǵarýǵa negiz saldy. Qazaqstan Prezıdenti Qasym-Jomart Kemeluly Toqaev О́zbekstanmen ózara tıimdi seriktestikti nyǵaıtý men damytýǵa erekshe kóńil bóledi», — dedi A. Mamın.

QR Premer-Mınıstri úshinshi elderden taýarlar men qyzmetterdiń ımportyna táýeldilikti tómendetý maqsatynda Qazaqstan men О́zbekstannyń óndiristik prosesterin ıntegrasııalaýdyń ózektiligi artyp kele jatqanyn atap ótti.

Jańa óndiristik jelide «Chevrolet» markaly avtomobıliniń – Damas, Labo, Trailblazer, Malibu, Spark jáne t. b. birneshe modelderi qurastyrylatyn bolady. «Chevrolet Damas» avtobýsy men «Chevrolet Labo» júk mashınasynyń qoljetimdi túpkilikti quny shamamen 3 mln teńgeni quraıdy, bul olardyń saýda, logıstıka, aýyl sharýashylyǵy jáne basqa da salalardaǵy shaǵyn jáne orta bıznes úshin tartymdylyǵyn arttyrady.

Avtomobıl jasaý — QR ekonomıkasynyń qarqyndy damyp kele jatqan salalarynyń biri. Bıyl avtoónerkásip óniminiń jalpy kólemin jylyna 100 myń avtomobılge deıin, salany jergiliktendirýdiń ortasha deńgeıin 50%-ǵa deıin, al kommersııalyq tehnıka men avtobýstar boıynsha 60-65%-ǵa deıin jetkizý kózdelgen.