Almaty qalasy ákimi Baqytjan Saǵyntaev tótenshe jaǵdaı rejımin qamtamasyz etý jónindegi memlekettik komıssııanyń sheshimderin iske asyrý maqsatynda engiziletin qosymsha shekteý sharalary týraly aıtty.
 
Qosymsha sharalarǵa sáıkes 28 naýryz saǵat 00.00-den bastap, 5 sáýiri saǵat 23.59-ǵa deıin qalanyń tynys-tirshiligin qamtamasyz etetin uıymdardan bólek, barlyq uıymdar men kásiporyndardyń jumysy ýaqytsha toqtatylady. Bul sanatqa qalalyq basqarý organdary, azyq-túlik, medısınalyq jáne veterınarlyq nysandar, qalanyń tynys-tirshiligi men qaýipsizdigin úzdiksiz qamtamasyz etetin qyzmetter men BAQ kirmeıdi.
 
Qalada adamdar men jeke kóliktiń júrýine tyıym salynady. Tek shuǵyl jaǵdaıda ǵana júrip-turýǵa ruhsat. Azyq-túlik jáne dári-dármekter alý úshin úıdiń qasyndaǵy dúken men dárihanaǵa barǵan jón. Sondaı-aq úı janýarlaryn serýendetýge ruqsat etilgen.

– 65 jastan asqan turǵyndardyń kóshege shyqpaýyn suraımyn. Bul rette muqtajdarǵa áleýmettik qyzmetkerler men eriktiler qajetti kómek kórsetedi. Qalada kámeletke tolmaǵandardyń eresektersiz júrýine bolmaıdy, – dedi Almaty qalasynyń ákimi.

Sonymen qatar, qoǵamdyq kóliktiń jumys kestesi saǵat 06.00-den keshki 19.00-ge deıin qysqartyldy. Olarda barlyq sanıtarlyq-epıdemıologııalyq normalar saqtalýǵa tıis. Qoǵamdyq kóliktegi jolaýshylar 40%-dan aspaýy kerek. Sonymen qatar, qaýipsizdik jáne júrgizýshilerdiń koronavırýsty juqtyrý qaýpin azaıtý maqsatynda júrgizýshilerge qoǵamdyq kóliktiń aldyńǵy esikterin ashýǵa tyıym salý týraly sheshim qabyldandy.

Sondaı-aq qalany dezınfeksııalaý boıynsha aýqymdy jumystar júzege asyrylatyn bolady. Árbir aýdan boıynsha aýmaqty óńdeýdiń jalpy kestesin aýdan ákimdikteriniń apparattary jáne dezınfeksııalyq óńdeýge tartylǵan basqa da uıymdar júrgizip, retteıdi. Dezınfeksııa júrgizilgennen densaýlyqqa zııan tımes úshin 5 saǵattaı dalaǵa shyqpaý kerek.

Azyq-túlik, dári-dármek jáne birinshi kezektegi qajetti zattardy jetkizý qyzmetteri saǵat 9.00-den 22.00-ge deıin qoljetimdi bolady. Barlyq uıymdar, kásiporyndar men qalalyq qyzmetterdiń jumysshylary sanıtarlyq qorǵaý tártibin kúsheıtedi.

Tótenshe jaǵdaı kezinde týystarǵa baryp, qonaq shaqyrýǵa tyıym salynady. Jerleý rásimine qatysatyndar 10 adamnan aspaý kerek. Qala kóshelerinde quqyq qorǵaý organdary men QR Ulttyq gvardııasynyń ókilderi táýlik boıy baqylaıtyn bolady. Tártipke baǵynbaǵandar úshin ákimshilik jáne qylmystyq jaýapkershilik kózdelgen.
"Qamshy" silteıdi
Ilmek sózder: karantın

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir