Nur-Sultanda terakt uıymdastyrmaq bolǵan er adam ustaldy - UQK

25 naýryzda Ulttyq qaýipsizdik komıteti Nur-Sultan qalasynda jedel-izdestirý is-sharalarynyń nátıjesinde destrýktıvti dinı aǵym ustanýshysyn ustady. Bul týraly UQK-nyń baspasóz qyzmeti habarlady. 

Komıtet málimetinshe, ol "DAISh" halyqaralyq terrorıst uıymy (Qazaqstanda tyıym salynǵan) ıdeologııasynyń yqpalymen astana aýmaǵynda terakt daıyndady degen kúdikke ilindi. Tergeý is-qımyldary barysynda odan joıý elementteri bar qoldan jasalǵan jarylǵysh qurylǵy alyndy.

"Kórsetilgen adamǵa qatysty Qazaqstan Respýblıkasy Qylmystyq kodeksiniń 24 jáne 255 (terrorızm aktisine daıyndalý) baptary boıynsha sotqa deıingi tergep-tekserý bastaldy. Tergeý jalǵasyp jatyr" delingen habarlamada.