Ońtústik Koreıada kólikpen bala qaqqan qazaqstandyqqa sot úkimi jeńildetildi

QR Syrtqy ister mınıstrligi Ońtústik Koreıada eki jyl alty aı merzimge bas bostandyǵynan aıyrylǵan Qazaqstan azamaty Syrym Sháribekke taǵaıyndalǵan jaza ózgertilgenin habarlady.

Mınıstrlik málimetinshe, búgin, ıaǵnı 26 naýryzda Changvon qalasynda Qazaqstan azamatyna qatysty is boıynsha apellıasııalyq sottyń qorytyndy otyrysy ótken.

"Sot otyrysyna qazaqstandyq dıplomattar da qatysty. Koreıadaǵy QR Elshiliginiń qoldaýymen aýdarmashy qyzmeti aqysyz negizde usynyldy. Tyńdaý barysynda sot buryn shyǵarylǵan úkimdi (2 jyl 6 aı) tym qatań dep sanap, bas bostandyǵynan aıyrý merzimin túzeý jumystarymen qosa alǵanda 2 jylǵa deıin qysqartý týraly sheshim qabyldady. Sonymen qatar, qorǵaý tarapynyń Koreıa Respýblıkasynyń Joǵarǵy Sotyna 7 kún ishinde appelıasııaǵa berý quqyǵy bar. Atalǵan ýaqyt boıy S. Sháribek tergeý ızolıatorynda bolady, al apellıasııa bolmaǵan jaǵdaıda Changvon qalasynyń túrmesine aýystyrylady. Jazany óteý merzimi ustalǵan sátten, ıaǵnı 2019 jylǵy 14 qazannan bastap esepteledi. Osylaısha, jazanyń jalpy merzimi 1 jyl 6 aıdy quraıdy. Bizdiń otandasymyzdyń jaǵdaıy jaqsy, onyń eshqandaı shaǵymy joq" delingen mınıstrlik taratqan aqparattyq habarlamada.

2019 jylǵy 16 qyrkúıekte Koreıa Respýblıkasynda zańsyz júrgen Qazaqstan azamaty kólikpen balany qaǵyp, oqıǵa ornynan qashyp ketken. Onyń júrgizýshi kýáligi bolmaǵan. Artynsha ushaqqa bılet alyp, Qazaqstanǵa qaıtyp ketken. Al qazan aıynyń ortasynda qazaqstandyq jigit tergeý sharalaryna qatysý úshin Seýl qalasyna óz erkimen ushyp barǵan. Ol Changvon qalasynyń tergeý ızolıatoryna qamaldy.

Tergeý barysynda zardap shekken balanyń joldy ruhsat etilmegen jerden kesip ótkeni anyqtaldy. Jábirlenýshiniń ata-anasy balalarynyń mıyna qan ketkenin, onyń emine 50 myń dollardan astam qarjy jumsalǵanyn, bala kútimi úshin jumystan shyǵýlaryna týra kelgenin aıtyp, aıyptalýshyǵa keshirim bermegen.