Almatyda 8633 kireberis pen 1441 aýla dezınfeksııalanady

Almaty qalalyq turǵyn úı saıasaty basqarmasy kún saıyn kúnine eki ýaqyt megapolıstegi joldardy jýýdy uıymdastyrýda, dep habarlaıdy ákimdiktiń baspasóz qyzmeti.

Bul jumystarǵa sýaryp jýatyn 90 kólik, trotýar jınaıtyn 54 mashına men 962 jol jumysshylary jumyldyryldy. Sondaı-aq qosymsha 112 adam qoqys jáshikterin, oryndyqtar men aıaldamalardy dezınfeksııalaýmen aınalysýda.

Búgin, 32 brıgada kóppáterli turǵyn úılerdiń kireberisterin zalalsyzdandyrýdy bastady. 8633 kireberis (2868 úı) pen 1441 aýlany óńdeý josparlanýda.

Tazalaý jumystary júrgizilmes buryn daýys zoraıtqysh jabdyǵy bar kólikter arqyly eskertýler habarlanady. Sondaı-aq kelesi óńdeý jumystarynyń kestesi kireberisterge ilinedi.

Budan ózge 25 naýryzda Esentaı, Úlken Almaty jáne Terenkýr ózenderiniń jaǵalaýyn dezınfeksııalaý josparlanyp otyr.

Sonymen qatar, qalanyń tazartý jumystaryna Almaty garnızonynyń kúshteri tartyldy. Olar birinshi kezekte jalpy kólemi 60 ga. bolatyn qalanyń jeti iri bazarlaryn dezınfeksııalady. Bul jumysqa 317 sarbaz jumyldyryldy. Oǵan qosa 11 birlik arnaıy tehnıka men óńdeý jumysyna kıiletin 151 kıim jıyntyǵy berildi. 49 tonna arnaıy sý eritindisi jumsaldy.

Sonymen qatar, garnızon qyzmetkerleri karantındik baqylaýda turǵan 13 medısınalyq uıymǵa sanıtarlyq óńdeý júrgizbek. Bul jumysqa 320 áskerı qyzmetshi jumyldyrylady.