24 Naýryz, 2020 NEWS

Kólginov koronavırýstan qalaı aman qutylýǵa bolatynyn aıtty

Foto: uralskweek.kz

Nur-Sultan qalasynyń ákimi Altaı Kólginov koronavırýs indetiniń keńinen taralmaýy úshin jasalatyn qatań saqtyq sharalar týraly aıtyp berdi, dep habarlaıdy Qamshy.kz aqparat agenttigi Elorda Info deregine júginip.
 
Bas qala ákiminiń aıtýynsha, koronavırýspen kúreste áýeli jemisti eńbek etip kele jatqan Qytaı men Ońtústik Koreıa sekildi temirdeı tártip kerek. Sosyn qala mańyndaǵy eldi mekender úshin júrip-turýdy toqtatýdyń mańyzyn ataǵan. Sonymen birge, ákim indetke tózim qýaty tómen qarttar máselesin de nazarǵa alǵan.
 
Qyl-qysqasy, osy jáne ózge de saqtyq sharalarǵa arnalǵan qatań tártip máselesi Altaı Kólginovke qaıtalap málimdeme jasaýǵa sebep bolǵan. 
 
Osy rette biz "Kornavırýs pandemııasy álem boıynsha jyldam taralyp keledi" dep bastaǵan Altaı Kólginov málimdemesiniń tolyq mátinin qaz-qalpynda usynǵandy jón kórdik. 

«Qurmetti elorda turǵyndary! Kornavırýs pandemııasy álem boıynsha jyldam taralyp keledi. Osylardy eskere otyryp, bizdiń elde de qatań sharalar qabyldandy.

Birinshiden, biz ózge elderdiń tájirıbelerin qaradyq.

Dúnıejúzilik densaýlyq saqtaý uıymy aýyrǵan bir adam keminde 2-3 adamǵa juqtyratynyn málimdedi. Al 5-6 kúnniń ishinde aýyrǵan bir adam 3,5 myń adamnyń dertti bolýyna sebep bolady.

Eýropa qalalary birinen keıin biri karantınge jabylyp jatyr. Olardyń keıbireýleri sheshimdi tym kesh qabyldaǵanyn kórip otyrsyzdar.

Al vırýs alǵash tirkelgen Qytaı, kúresti temirdeı tártiptiń negizinde júrgizdi. Qytaı, Ońtústik Koreıa elderi azamattardy oqshaýlaýdyń qatań ádisin qoldandy. Mekemeler, kásiporyndar, qoǵamdyq kólikter jumystaryn toqtatty. Olar kúndep emes, aılap úılerinen shyqpady. Tek osyndaı tártip qana medısına qyzmetkerlerine úlken kómek boldy jáne oń nátıje berdi.

Bizdiń elimizde de is-sharalar der kezinde qolǵa alynyp, Tótenshe jaǵdaı jarııalandy. 22 naýryzdan beri elordaǵa kirýge de, shyǵýǵa da tyıym salyndy. Bunyń bári sizderdiń qaýipsizdikterińiz úshin qabyldanǵan sheshim.

Ekinshiden, sheteldik tájirıbe kórsetkendeı, bul indetti jasy úlken, sozylmaly dertteri bar azamattar kótere almaı jatyr. Sondyqtan biz qazynaly qarııalarymyzdyń amandyǵyn oılaýymyz qajet. Ásirese jasy úlken azamattarymyzdyń syrtqa shyqpaýyn ótinemiz. Sabyr túbi sary altyn. Qıyn kezeńde ózderińiz úshin tózimdilik tanytyńyzdar. Basqa jol joq.

Osy kúnderi baıqaǵanymyz jaǵdaıdy kópshilik túsinip otyr, rahmet aıtamyz. Biraq áli osy qaýipti tereń sezinbegen azamattar da bar. Dál qazir týysyńyz ben jaqynyńyzǵa shyn janashyr bolsańyz, olardyń amandyǵyn tileseńiz, onda óz úıińizde otyrýyńyz kerek.

Úshinshiden, qala mańyndaǵy karantınge kirmeıtin eldi meken turǵyndary elordaǵa kelýdi qoıa turý qajet. Biz jumys berýshilerge qyzmetkerleriniń amandyǵy úshin, jumysty toqtatýdy jáne jumys oryndarynyń saqtalýy qajettigin aıttyq.

Tórtinshiden, tártip máselesi. Tártipke baǵynǵan qul bolmaıdy deıdi. Mundaı kezeńde zańbuzýshylyqtarǵa jol berilmeıdi. Kez kelgen zańsyzdyq qatań jaýapqa tartylady.    

Besinshiden, búgin Memleket basshysy ekonomıkany, shaǵyn jáne orta bıznesti, áleýmettik az qamtylǵan toptardy qoldaýǵa, jumyspen qamtýǵa baǵyttalǵan sharalar qabyldady. Bıznes ókilderi óz kezeginde jumys oryndaryn qysqartpaýlary qajet.

Elbasynyń Úndeýinen keıin el azamattary úlgi bolyp arnaıy qorǵa aqsha aýdaryp jatyr. Osy Úndeýge sáıkes, biz Nur Otan partııasymen birge birinshi kezekte kómekke muqtaj azamattarǵa kómektesýdi bastap kettik.  

Karantın men koronavırýsqa qatysty suraqtaryńyz bolsa 109 nomerine habarlasýyńyzǵa bolady. Ol jerde qosymsha telefon ortalyǵyn ashtyq. Karantın erte aıaqtalsyn desek, tártipke baǵynyp, jaýapkershilikti tereń sezinýimiz kerek. Biz bul qıyndyqty birge eńseremiz. Biz birgemiz», - deıdi qala ákimi Altaı Kólginov.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir