500 myń adam azyq-túlik jıyntyǵymen qamtylady

QR Aqparat jáne qoǵamdyq damý mınıstri Dáýren Abaev koronavırýsqa baılanysty qolǵa alynyp jatqan sońǵy sharalar týraly aıtyp berdi.

Tótenshe jaǵdaıǵa baılanysy 500 myń adamǵa azyq-túlik jıyntyǵy berilmek.

– Bir adamǵa azyq-túlik jıyntyǵyn berýdiń erekshe tártibi ázirlendi. Ol boıynsha karantın aımaǵynda turatyn jáne ataýly áleýmettik kómek alatyn otbasylardyń 6 jastan 18 jasqa deıingi balalary men eresek músheleri, sonymen qatar 1-toptaǵy barlyq múgedekter qamtamasyz etiledi. Jalpy mundaı kómekpen jarty mıllıonnan astam adam qamtylady, – dedi Dáýren Abaev.

Mınıstr Almatyǵa koronavırýsty anyqtaıtyn 266 myń test jetkiziletinin aıtty.

– 27 naýryzda Almaty qalasyna 266 myń test alyp keledi. Olar kedendik jáne valıdasııa prosedýrasynan ótkiziledi. Boljammen 29 naýryzda olar eń aldymen dárigerlerdiń qolyna tıedi. Bulardyń barlyǵy tegin testiler, – dedi mınıstr.

Onyń atap ótýinshe, osy ýaqytqa deıin elde koronavırýs ınfeksııasyn anyqtaýǵa arnalǵan 15 myńnan astam test jasaldy. Qazirgi ýaqytta kúnine myńnan astam test jasalyp jatyr. Bul jumystar aldaǵy ýaqytta da jalǵasady.

Tótenshe jaǵdaıdyń engizilýine baılanysty 2019 jyly kóktemde shaqyrylǵan azamattardy áskerı qyzmetten bosatý jáne áskerge shaqyrý ýaqytsha toqtatylady.