24 Naýryz, 2020 NEWS
Ulybrıtanııadaǵy Marjan esimdi qazaqstandyq koronavırýstan qalaı emdelgeni týraly Instagram jelisinde jazba jarııalady. Ol úı karantıninde qajetti em sharalaryn alyp, qalaı kútingenin ashyp aıtty.
– Barlyǵy 2 apta buryn bastaldy. Kenetten basym aýyryp, ózimdi álsiz sezindim. Bir aptanyń ishinde osy aýrý belgili boldy. Birde paıda bolyp, birde joq boldy. Dúısenbiden bastap Borıs Djonson eldegi asa (dárigerler, kólik júrgizýshileri) qajetti mamandyq ıelerinen basqa barlyq adamdarǵa úıde qashyqtyqtan jumys jasaýǵa buıyrdy. Sol sebepti seısenbiden bastap úıde jumys istedim, birneshe ret onlaın kezdesý ótkizdim, alaıda tústen keıin demalys aldym. Sebebi ózimdi nashar sezindim. Al túnde dene qyzýym kóterildi. Kelesi kúni jalǵasa berdi, bulshyq etterim aýyryp, qaltyraý bastaldy. Biraq sýyq tııý belgileri, jótel bolǵan joq, – dedi Marjan esimdi jeli qoldanýshysy.
Onyń aıtýynsha, beısenbi kúni qyzýy túsip, ózin álsiz sezingen. Tek shomylý men namazǵa turyp júrgen. Sondaı-aq ol aýyrǵan ýaqytta eshqandaı ıisti sezbegenin atap ótti.
⠀
– Keıinnen dáriger bunyń koronavırýs ekenin anyqtady. Eshqandaı em joǵyn jáne demalyp, ımmýnıtetim aýrýdy jeńgenshe kútinýimdi aıtty. Qudaıǵa shúkir men tynys alý syrqattarymen aýyrmaımyn. Temeki shekpeımin, ishimdik ishpeımin. Kúıeýim bal qosylǵan zimbir sýsynyn kúndelikti daıyndap berdi. Immýnıtetimdi kóterý úshin jasalyp jatqan barlyq dúnıeler áser etip, jaqsy nátıje berip jatyr. Keıinnen ulym da aýyryp qaldy, alaıda balalar bul vırýspen jaqsy kúresedi eken, – dedi Marjan.
Ol jelidegi oqyrmandaryna koronavırýstyń belgileri tabylǵan jaǵdaıda eshqandaı dúrbeleńge salynbaı, úı jaǵdaıynda qalaı kútiný qajettigin atap aıtty.
⠀
– Aýyrǵan adamdardyń 80%-y úı jaǵdaıynda jazylady, olarda meniki sııaqty aýrýdyń belgileri nemese odan jeńil túrleri bolýy múmkin. Eń bastysy – dúrbeleńge salynbaý. Jaratýshy adamnyń ómiriniń sońyn aýrýǵa alyp kelse, odan eshqandaı jolmen qashyp qutyla almaısyń, kerisinshe oǵan shahıd dárejesi beriledi. Al aýrýdyń taralmaýy úshin úıde otyrǵan adamdarǵa saýap shahıdpen birdeı beriledi, – dep ol oqyrmandaryn sabyrǵa shaqyrdy.
Marjan óziniń bastan keshken oqıǵasyn baıandaı otyryp, dárigerlerdiń gıgıenaǵa baılanysty keńesterin úzdiksiz oryndaýǵa jáne ımmýnıtetti kúsheıtiýge keńes berdi.
– О́ıtkeni ımmýnıtet – vırýspen kúresedi. Jańa daıyndalǵan kókónis pen jemis sýsyndaryn, qara zere maıyn ishińizder, sonymen qatar dárýmenderge baı tabıǵı taǵamdardy jeńizder. Eger de denińiz saý bolsa, sportpen shuǵyldanyńyzdar. Aýrýdyń belgileri tabylsa, qorǵanyp, ózińizdi oqshaýlańyz, – dedi sózin túıindep.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir