Toqaev: Bizde qaǵaz júzinde bári jetkilikti

Búgin, 21 narýyzda Qazaqstan prezıdenti Qasym-Jomar Toqaev eldegi pandemııaǵa qarsy kúres jumystaryn úılestiretin ortalyqtyń jumysymen tanysty. Bul aqparatty Aqorda saıty habarlady. 

Aqorda habarlamasyn qarǵanda, densaýlyq saqtaý mınıstri Eljan Birtanov prezıdentke álemde jáne elde koronavırýstyń taralýyna qarsy kúresti úılestirý jáne monıtorıng jasaý ádisteri, onyń ishinde aýyrǵandardy anyqtaý jáne esepke alý jónindegi jumystarda sıfrlyq tehnologııany qoldaný týraly baıandaǵan.

Al prezıdent halyqty tynyshtyq saqtaýǵa shaqyryp, úkimetke indettiń taralýyna baılanysty qaýesetter men dúrbeleńge tosqaýyl qoıý úshin azamattardy shuǵyl ári shynaıy aqparattarmen qamtamasyz etý mindetin qoıdy. 

Aqordanyń jazýynsha, Toqaev koronavırýsqa qarsy kúresý úshin qabyldanyp jatqan sharalarǵa oń baǵa berdi, biraq áli de nátıje kerek ekenin aıtty.

"Úkimet az jumys istegen joq. Mamandardyń baǵalaýynsha, biz Eýropa elderine qaraǵanda aıtarlyqtaı shuǵyl áreket etip jatyrmyz. Degenmen bizge nátıje kerek. Halyq áli tolyq aqparat ala almaı otyr. Bizde áli kúnge deıin tıisti kólemde betperdelerdiń jetispeıtindigin atap aıtqym keledi. Biraq qaǵaz júzinde bári jetkilikti. Bir jaǵynan halyq dárihanalarda betperdelerdiń áli de joq ekenin aıtyp shaǵymdanýda. Nege? Bul alypsatarlyq dep oılaımyn" dedi prezıdent. 

Buǵan qosa,Toqaev memleket eldegi barlyq qalalarda azamattarǵa tegin maska tarata alatyndaı bolýy kerek ekenin aıtty. 

Prezıdent pandemııanyń 160-tan astam elge taralǵanyn aıtyp, "shekaralas memlekettermen birlese áreket etken jón" dedi.

Onyń aıtýynsha, elde karantın rejımin saqtaýdyń mańyzy zor.

"Baqylaý-ótkizý beketterin qoıǵanymyz ázil nemese qoıylym emes. Karantın rejımin qatań saqtamaı, biz bul baǵytta eshqandaı tabysqa qol jetkize almaımyz. Biz karantın jaǵdaıyn qatań saqtaýǵa tıispiz" dedi prezıdent.

Buǵan qosa, Toqaev otandyq medısınany, sonyń ishinde, sanıtarlyq-epıdemıologııalyq qyzmetti jáne medısına ǵylymyn damytýǵa basa mán berý kerek ekenin aıtty.

"Qazir búkil álemniń jáne búkil álemdik ekonomıkanyń taǵdyry ǵalymdardyń qolynda. Bul artyq aıtqandyq emes. Álemniń taǵdyryn fýtbolshylar, shoý-bıznes ókilderi emes, ǵalymdar sheshedi. Biz osy jaǵdaıdan sabaq alýǵa tıispiz" dedi ol.

Resmı aqparat boıynsha, Qazaqstanda vırýs juqtyrǵan 53 adam anyqtaldy. Nur-Sultanda – 28 adam, Almatyda – 22 adam, Qaraǵandyda – 2 adam, Almaty oblysynda 1 adam emdelip jatyr.

Qazaqstanda Covid-19 koronavırýsyn juqtyrǵandar alǵash ret 13 naýryzda anyqtalǵan. Keıin, 15 naýryzda – vırýs juqtyrǵandar sany segiz adamǵa jetkende prezıdent Qasym-Jomart Toqaevtyń jarlyǵymen elde 16 naýryz tańǵy segizden 15 sáýir tańǵy jetige deıin tótenshe jaǵdaı jarııalanǵan bolatyn. Al 19 naýryzdan bastap eldiń eki iri qalasy – Nur-Sultan men Almaty karantınge jabyldy.